Tinan ne’e, MJ altera lei kriasaun Sentru Formasaun Jurídika no Judisiária

DILI, 20 janeiru 2025 (TATOLI)—Ministériu Justisa (MJ) planeia iha tinan ne’e halo alterasaun ba lei kriasaun Sentru Formasaun Jurídika no Judisiária (CFJJ-sigla portugés) inklui lei importante 20 seluk.
“Planu lejizlativa ne’ebé Ministériu Justisa iha ba tinan ne’e mak alterasaun ba estatutu kriasaun Sentru Formasaun Jurídika Judisiária inklui lei estruturante 20 sira seluk,” Hornai hateten ba jornalista sira iha Ministériu Finansa, Ai-tarak Laran, Dili, segunda ne’e.
Nia esplika katak lei 20 ne’ebé Ministériu Justisa tau ona iha planu lejizlativu tinan ne’e atu altera mak hanesan Kódigu Sivíl, Kódigu Prosesu Sivíl, Kódigu Penál, Rejime Jurídiku ba Propriedade Privada ho Estadu nune’e bá oin Governu bele regulariza ho di’ak kona-ba arrendamentu rai, Lei Protesaun Testemuña ne’ebé pendente dezde iha 2009 no lei estruturante ne’ebé Ministériu Justisa konsidera importante.
Notísia relevante: MJ komprometidu sei halo alterasaun ba estatutu kriasaun sentru formasaun jurídika
“Alterasaun ba lei sira-ne’e ita sei halo iha tinan ida-ne’e nia laran. Serbisu sira-ne’e ita sei hahú iha trimestre dahuluk to’o trimestre dahaat tinan ne’e, ne’e bele la’o tuir planu lejizlativa ne’ebé Governu dezeña ona,” nia sumariza.
Sentru Formasaun Jurídika no Judisiária, abreviadamente dizignadu ba CFJJ, nu’udár serbisu hosi Ministériu Justisa ne’ebé responsabiliza atu asegura formasaun, investigasaun no realizasaun estudu iha área justisa no direitu. La’ós de’it kapasitasaun ba servisu iha setór justisa, maibé mós ho nia dezenvolvimentu ba longu prazu ho baze ba prinsípiu no valór konstitusionál no promove partisipasaun sosiedade sivíl ne’ebé integradu.
Jornalista: Natalino Costa
Editór: Xisto Freitas da Piedade

