OÉ-CUSSE, 22 Janeiru 2025 (TATOLI)– Komandante Polísia Nasionál Timor-Leste (PNTL) Rejiaun Administrativa Espesiál Oé-Cusse Ambeno (RAEOA), Superintendente Polísia, Nicolau Francelino da Costa, relata Komandante Jerál Polisia Nasionál Timor-Leste (PNTL) planeia ona atu halo manutensaun ba kazerna PNTL eskuadra sub-rejiaun Pássabe hodi fasilita membru sira atu serbisu ho di’ak.
“Ita bo’ot sira akompaña di’ak tanba kondisaun kazerna eskuadra PNTL la di’ak liuliu iha Pássabe. Nune’e ami nia komandu Jerál PNTL mós iha ona planu atu hadi’a ami-nia eskuadra no mós ami-nia kondisaun kazerna sira-ne’ebé membru PNTL hela ba iha kada eskuadra,” relata Francelin0 da Costa, ba jornalista sira iha Oé-Cusse, ohin.
Notísia relevante:Kazerna PNTL Eskuadra Pássabe la dignu ba membru sira atu hela
Maske, Komandante PNTL ne’e dehan kondisaun kazerna la dignu maibé la hamate espíritu nasionalizmu nu’udar servidór Estadu ba asuntu seguransa, hodi kontinua fó seguransa ba povu tomak.
“Ita haree kada eskuadra sira-nia kondisaun agora grave teb-tebes, maibé ami husi PNTL hahú husi ha’u nu’udar Komandante PNTL Rejionál Oé-Cusse ho membru PNTL tomak, ami iha kompromisu ida-ne’ebé mak boot, ami kontinua nafatin halo serbisu hodi servi povu iha rai doben Timor-Leste, liuliu iha Oé-Cusse,” nia garante.
Molok ne’e, Jestór Sub-rejiaun Pássabe, Paulino Marques, hato’o preokupasaun relasiona ho kondisaun kazerna PNTL referidu.
“Ami husu tau netik atensaun hodi hadi’a kazerna PNTL Eskuadra Pássabe, ne’ebé oras ne’e dodook ona no la dignu nu’udar hela fatin ba membru seguransa nasaun nian iha fatin ne’e”, Paulino Marques hateten iha Pássabe.
Entretantu, Xefe suku Abani, Carlos Elo, husu mós Ministériu Interiór atu halo manutensaun atu membru sira hela iha fatin dignu.
“Ami preokupa tanba sira iha arma nasaun nian, entaun sira tenke iha fatin dignu atu hela. Dalaruma husi rai viziñu Indonézia mai vizita, entaun ida-ne’e hatudu imajen ladun di’ak”, Autoridade lokál ne’e afirma.
Relembra fali katak Prezidente Autoridade RAEOA, Rogério Tiago de Fatima Lobato, mós haree ona kondisaun kazerna PNTL iha Pássabe.
Notísia relevante:Komandu PNTL nomeia Inspetór Xefe Herman Metan lidera eskuadra Pássabe
Jornalista: Abílio Elo Nini
Editór: Florencio Miranda Ximenes
