iklan

HEADLINE, SEGURANSA

PNTL entrega ona insidente Faról no Fatuhada ba AFP halo ezaminasaun

PNTL entrega ona insidente Faról no Fatuhada ba AFP halo ezaminasaun

Komandante Jerál PNTL, Komisáriu Jerál Polísia, Henrique da Costa. Imajen Tatoli/Egas Cristovão

DILI, 27 janeiru 2025 (TATOLI)—Komandu Polísia Nasionál Timor-Leste (PNTL) ofisialmente entrega kilat-musan kazu ema deskoñesidu tiru rezidénsia antigu Prezidente Repúblika, Francisco Guterres Lú Olo iha Faról inklui amostra kilat-musan kazu ema deskoñsidu tiru  karreta Toyota Hilux iha Fatuhada ba Australian Federal Police  (AFP) atu halo ezaminasan nune’e bele deskobre utilizasaun arma.

“PNTL ita iha kooperasaun ho sira (Australian Federal Police) hodi halo ezaminasaun ba evidénsia sira-ne’e. Rezultadu sei aprezenta ba iha Ministru Interiór  no mós sei aprezenta ba iha Ministériu Públiku para bele halo prosesu,” Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, hateten ba jornalista sira bainhira partisipa serimónia avaliasaun prioridade lima Komandu Jerál PNTL 2023-2028 ne’ebé halo iha Suai Room, Timor Plaza, segunda ne’e.

Nia dehan, ezaminasaun ba kilat-musan ne’e tenke envolve ema terseira parte tanba la fásil atu identifika evidénsia sira-ne’e.

“Prosesu tomak ne’e agora la’o hela. Iha buat balun ne’ebé mak presiza husi terseira parte ninian.  Ita-boot sira hatene prosesu sira hanesan ne’e la temi dehan loron ida ka loron tolu bele finaliza, maibé presiza tempu atu haree evidénsia sira-ne’e,” nia esplika.

Notísia relevante: Falur orienta Servisu Informasaun F-FDTL buka tuir ema deskoñesidu tiru karreta

Iha fatin hanesan, Ministru Interiór, Francisco da Costa Guterres, informa teste ne’e PNTL bele halo más kazu balun dalaruma ema dehan iha tendénsia polítika, tan ne’e buka fali ema terseira parte para mai fó opiniaun ne’ebé neutru liu duké dún malu.

“Ita bele halo, más di’akliu atu labele iha problema, husik ba ita buka para rezolve tiha kazu ne’e tau ba loos. Purke, ha’u hatene katak buat balun bele dada ba polítika, tanba ne’e mak di’akliu buka ema parte neutru ida para rezolve tiha buat ne’e,” nia informa.

Antes ne’e, Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul “Falur Rate Laek”, fó ona orientasaun ba Servisu Informasaun F-FDTL atu buka tuir ema balun ne’ebé lori arma tiru  karreta Toyota Hilux ne’ebé para hela iha edifísiu empreza Lisun Fatuhada, Dili, sábadu (17/1/2025).

Jenerál Falur haktuir, bazeia ba informasaun ne’ebé nia simu husi Komandante Jerál PNTL, Henrique da  Costa  katak kazu kilat-musan ne’e akontese dala tolu ona. Ida mak kilat-musan ne’ebé ema deskoñesidu tiru iha rezidénsia antigu Prezidente Lú Olo iha Faról, 01 janeiru 2025 madrugada Otl, ida seluk akontese iha Taibessi no ida seluk tan mak foin daudaun tiru karreta Toyota Hilux.

Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!