Top

Hornai no Tom diskute prevensaun krime transnasionál no formasaun rekursu umanu

Ministru Justisa, Sergio Honai hasoru malu ho Ministru ba Asuntu Interiór, Imigrasaun no Multikulturalizmu Austrália, Tom Tony Burkey, hodi ko’alia kona-ba hametin kooperasaun Timor-Leste no Austrália iha prevensaun krime transnasionál. Imajen TATOLI/Natalino Costa

DILI, 28 janeiru 2025 (TATOLI)—Ministru Justisa, Sergio Honai hasoru malu ho Ministru ba Asuntu Interiór, Imigrasaun no Multikulturalizmu Austrália, Tom Tony Burkey, hodi ko’alia kona-ba hametin kooperasaun Timor-Leste no Austrália iha prevensaun krime transnasionál no apoia formasaun ba Polísia Sientífika Investigasaun Kriminál (PCIC, sigla portugés).

“Asuntu temátiku rua ne’ebé ita ko’alia mak kona-ba apoia ne’ebé Polísia Federál Austrália hamutuk ho Polísia Nasional Timor-Leste estabelese tiha ona iha tinan 20-resin, oinsá kooperasaun ne’e bele la’o nafatin. Enkontru ida-ne’e mós ko’alia Ministru Justisa iha mós PCIC nune’e ita hato’o ita-nia prontidaun servisu hamutuk ho Austrália hodi prevene krime sira transnasionál no krime kompleksidade sira ne’ebé mosu no sai hanesan preukupasaun internasionalmente hanesan tráfiku umanu, brankeamentu kapitál, finansiamentu terrorizmu, imigrante sira ne’ebé liga ho mobilidade ema no sasán  ne’ebé tama iha área jurisdisaun Timor-Leste nian,” Sergio hateten ba jornalista sira hafoin enkontru ho Ministru Tom ho komitiva iha gabinete Ministru Justisa, Colmera, Dili, tersa ne’e.

Nia esplika, krime hanesan tráfiku umanu, brankeamentu kapitál no finansiamentu terrorizmu no  imigrante  ne’e mak kuandu laiha kontrolu ida-ne’ebé di’ak, ema bele tama lori liu sasán sira hanesan droga liubá Austrália.

Notísia relevante: Krime brankamentu kapitál no finansiamentu terrorizmu sai problema boot iha mundu

Nune’e, liuhusi enkontru bilaterál ne’e, asuntu seluk ne’ebé diskute mak husu Austrália  atu kontinua apoia Timor iha área kapasitasaun rekursu umanu ba PCIC oinsá hamutuk fó seguransa ba nasaun ne’e.

Nia dehan, Ministériu  Justisa husu mós ba Austrália atu apoia PCIC iha formasaun téknika laboratória oinsá atu hasa’e abilidade rekursu PCIC nian ba ezaminasaun materiál krime sira no apoiu ekipametu ba PCIC  nian nune’e bele profisionaliza servisu PCIC.

“PCIC iha ona laboratóriu ba teste sira maibé bá oin presiza apoia ekipamentu adekuadu ruma nune’e profisionaliza servisu laboratóriu PCIC,” nia afirma.

Hornai hateten, iha enkontru ida-ne’e Austrália komprometidu katak prontu nafatin apoia Timor-Leste.

Iha tinan 2025, proposta orsamentu hosi PCIC ho nia totál US$2.184,301 hodi finansia programa sira, asesu ba justisa ho nia orsamentu US$1.960,877 no funsionamentu no dezenvolvimentu institusionál ho valór US$223.424.

Maski sai hanesan instituisaun ida-ne’ebé importante tebes ba aplikasaun lei, PCIC hasoru nafatin problema estruturál sira, hanesan falta ekipamentu modernu no falta pesoál ne’ebé hetan treinamentu iha investigasaun kompleksu sira. Ida-ne’e limita sira-nia abilidade atu hala’o investigasaun ne’ebé efetivu, liuliu iha krime kompleksu sira hanesan tráfiku droga no krime sibernétika. Nune’e, PCIC tenke investe liután iha formasaun no apoiu teknolojia forense avansadu sira. Hametin kooperasaun ho forsa seguransa no instituisaun judisiál sira seluk sei tulun mós atu hadi’a efikásia investigasaun kriminál sira iha Timor-Leste.

Jornalista: Natalino Costa

Editór: Xisto Freitas da Piedade

 

Publisidade

Leave a Reply

Latest Post

error: Content is protected !!