DILI, 30 Dezembru 2025 (TATOLI)—Polísia Nasionál Timor-Leste (PNTL) husu ba motorista sira karik atu halo viajen iha ámbitu loron boot, tenke kontrola veíkulu nia velosidade.
“Durante viajen husi Dili bá munisípiu, Autoridade Seguransa hakarak informa ba maluk sira ne’ebé halo viajen husi Dili bá munisípiu ka husi munisípiu mai Dili atu kontrola velosidade no kondisaun transporte antes la’o. Tenke mós respeitu nafatin regras utilizasaun estrada públiku, nune’e viajen bele seguru to’o iha fatin destinadu ne’ebé determina ona,” Portavós Komandu Jerál PNTL, Superintendente Xefe Polísia João Belo dos Reis, hato’o liuhusi konferénsia imprensa ne’ebé hala’o iha Kuartél Jerál PNTL, Kaikoli, Tersa ne’e.
Nia dehan, durante festeza tinan foun, Autoridade Seguransa bandu joven sira hemu tua iha fatin públiku.
“PNTL reafirma katak proibidu hemu tua ka lanu iha fatin públiku ne’ebé perturba pás no trankuilidade públika, karik hetan sei iha atuasaun ho rigorozo husi Forsa Tarefa Konjunta PNTL no F-FDTL (FALINTIL-Forsa Defeza Timor-Leste) hodi asegura iha sela detensaun,” nia bolu atensaun.
Notísia relevante : Motorista sira presiza kontrola kondisaun veíkulu hodi prevene asidente
PNTL bandu atu joven sira loke múzika ho lian maka’as tanba bele prejudika ema seluk nia deskansa.
“Autoridade PNTL mós hakarak apela joven no Komunidade atu ajuda malu ho responsabilidade, guarda seguransa no orden iha bairru idaidak, nune’e bele halo selebrasaun tinan foun nu’udar momentu dame no solidariedade,” nia fó hanoin.
João Belo mós fundamenta katak, Autoridade Seguransa reafirma kompromisu atu garante seguransa no trankuilidade públika durante selebrasaun tinan foun.
“Ita hotu hamutuk hodi hametin konfiansa,” nia afirma.
Iha biban ne’e, Belo mós husu ba maluk ne’ebé uza transporte asesu ba loja sira hodi bainhira sosa nesesidade sira iha loja lalabele hamusu engarrafamentu.
“Husu ba loja na’in sira atu kontrola estasionamentu transporte sira ne’ebé na’in kompras iha ita nia loja,” nia hato’o.
PNTL hakarak bolu atensaun ba komunidade hotu atu selebra tinan foun ho orden, seguransa no responsabilidade.
“Evita hahalok sira ne’ebé bele perturba orden públika ka halo perigu ba ita-nia an ka ema seluk nia vida, tanba PNTL hamutuk ho F-FDTL sei halo operasaun seguransa no disiplina iha bairru-bairru no iha tasi-ibun sira ne’ebé komunidade hakarak festeza tinan foun hodi evita atividade sira ne’ebé kontra lei no orden públika sei hetan atuasaun tuir lei,” Portavós apela.
Nia mós husu ba komunidade katak durante selebrasaun tinan foun 2026, ba ema sira ne’ebé husik uma iha kondisaun uma mamuk no ema laiha, husu atu hamate hotu aparellu uma ne’ebé liga ho eletrisidade.
“Taka didi’ak odomatan no janela sira, Koordena ho viziñu ka autoridade lokál atu prevene insidente kriminál no dezastre husi inséndiu ahi nian,” nia fó hanoin.
Jornalista : Natalino Costa
Editora : Julia Chatarina
