DILI, 03 fevereiru 2025 (TATOLI)– Dosente no funsionáriu iha Universidade Nasionál Timor Lorosa’e (UNTL) na’in-27 tama idade reforma, husi totál dosente permanente 418 no funsionáriu 373.
“Dosente Permanente iha UNTL hamutuk 418, destakamentu iha fakuldade 10, Fakuldade Agrikultura na’in-59, fakuldade Siénsia Sosiais na’in-65, fakuldade ekonómia no jestaun na’in-29, fakuldade turizmu na’in sia, fakuldade Edukasaun Arte no umanidade 106, fakuldade Enjeñaria siénsia teknolojia na’in-77, fakuldade medisina siénsia saúde iha 55, fakuldade direitu na’in 8, Fakuldade Filosofia Siénsia Umanu iha neen , fakuldade Siénsia Ezata iha haat”, Xefe Departamentu Rekursu Umanu iha UNTL, Mateus da Silva, hatete ba TATOLI, dehan iha knaar fatin, sesta liubá.
Ezekutivu ne’e hatutan, iha mós dosente kontratadu ba disiplina transparansia ne’ebé hanorin kona-ba Portugés, tétun no matemátika ne’e hamutuk 60, ne’e atu suporta ba iha fakuldade 10 ne’e, dalaruma dosente permanente sira sai sira-ne’e mak sei subtitui fali sira.
“Kona-ba dosente konvidadu nasionál no internasionál ne’e iha 80 ne’e dosente husi Cubano no Portugál sira”, Xefe Departamentu Mateus da Silva dehan.
Nia akresenta, iha UNTL mós apoiu ba administrasaun ba kada fakuldade sira-ne’e atu atinje meta universidade nia, sira iha funsionáriu permanente 373, iha mós ajente administrasaun biblioteka nian ne’e iha 11, no mós iha funsionáriu kontratadu ne’ebé apoiu iha gabinete reitória hamutuk na’in-40.
Nune’e Diretór Nasionál Rekursu Umanu, Câncio Monteiro, informa, UNTL nia dosente no funsionáriu hamutuk na’in ruanulu resin hitu (27) mak iha ona idade reforma.
“Formalmente dokumentu legál ita seidauk asesu maske prezidente Repúblika promulga ona Lei Reforma Obrigatóriu, maibé ita identifika ona funsionáriu UNTL nia dosente sira ne’ebé tama ona ba idade reforma obrigatóriu hamutuk sanulu resin ualu (18) no Rejime Jerál ba Funsionáriu Administrasaun nian hamutuk na’in sia (9)”, Diretór Monteiro dehan.
Dirijente ne’e salienta, atu responde ba pesoál hirak ne’ebé idade iha ona reforma mak parte Diresaun Rekursu Umanu dadaun ne’e prepara hela dadus tékniku tuir previzaun ba idade reforma nian.
“Planu Rekursu Umanu UNTL nian, dadus tékniku ita prepara hodi konfirma ho universidade hafoin universidade mak tenke halo desizaun polítika, parte rekursu umanu sei ezekuta tuir desizaun ne’ebé iha”, ezekutivu ne’e tenik.
Jornalista:Osória Marques
Editór: Rafael Ximenes de A. Belo