iklan

HEADLINE, POLÍTIKA

Xanana orienta KFP hadi’a sistema rekursu umanu iha administrasaun públika

Xanana orienta KFP hadi’a sistema rekursu umanu iha administrasaun públika

Prezidente Komisaun Funsaun Públika, Agostinho Letêncio de Deus. Imajen Tatoli/António Daciparu

DILI, 04 fevereiru 2025 (TATOLI)—Prezidente Komisaun Funsaun Públika, Agostinho Letêncio de Deus, hateten Primeiru-Ministru (MP), Xanana Gusmão, orienta Komisaun Funsaun Públika (KFP) servisu hamutuk ho liña ministeriál sira atu hadi’a sistema rekursu umanu  iha administrasaun públika no konsolida kapasidade rekursu umanu atubele atende didi’ak komunidade.

“Hadi’a sistema rekursu umanu iha administrasaun públika ne’e mak iha planu KFP nian ko’alia kona-ba revitalizasaun administrasaun públika,” Agostinho hateten iha nia intervensaun bainhira partisipa serimónia pose ba funsionáriu foun Ministériu Justisa na’in 74 ne’ebé hala’o iha salaun Ministériu Justisa, Colmera, tersa ne’e.

Nia esplika, kuandu ko’alia kona-ba revitalizasaun sistema, primeiru revitaliza uluk ema. Se bazeia ba dadus, KFP nia funsionáriu ne’ebé mak joven liu entre tinan 20-35 ne’e serka 7% de’it, katak funsionáriu ne’ebé iha administrasaun públika ho idade produtiva ne’e ki’ik demais, maioria ne’e idade 50 ba laten.

“Revitalizasaun sistema atu hadi’a liután administrasaun públika mak KFP hahú ho rekrutamentu sira hanesan agora halo ba iha Ministériu Justisa no sei halo mós ba instituisaun sira seluk,” nia esplika.

Aleinde ne’e, nia informa, atu hadi’a administrasaun públika, KFP agora esforsa hela hadi’a mekanizmu rekrutamentu, iha-ne’ebé hahú husi ajente depoizde bá ajente permanente iha funsaun públika nian.

Atu sai ajente administrasaun públika permanente, tuir Agostinho, tenke liuhusi etapa ida mellora karater funsionáriu sira ka bolu formasaun karater, tanba mai serbisu iha administrasaun públika ne’e atu atende públiku, la’ós atu mai atende pesoál.

Nia hateten, Komisaun Funsaun Públika sei kolabora ho F-FDTL atu funsionáriu molok atu hetan promosaun ba funsionáriu permanente tenke liuhusi formasaun karater iha sentru instrusaun F-FDTL Metinaro no kuandu nia liu ona formasaun karater mak bele promove nia bá ajente administrasaun permanente.

“Kuandu nia liu formasaun karater mak sei bá formasaun espesializada ba área ne’ebé nia hakna’ar an ba, nune’e bele forma nia karater sai ema ne’ebé ajente administrasaun públika nian duni,” nia haktuir.

Jornalista: Natalino Costa

Editór: Xisto Freitas da Piedade

iklan
iklan

Leave a Reply

iklan
error: Content is protected !!