DILI, 05 Fevereiru 2025 (TATOLI) – Konsellu Ministru aprova projetu dekretu Governu hodi estabelese taxa sira ne’ebé tenke selu tuir prosedimentu lisensiamentu ambientál. Projetu ne’e aprezenta husi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay.
Ministru Prezidénsia Konsellu Ministru, Agio Pereira, informa katak dekretu Governu ne’e ho objetivu atu regula pagamentu taxa ne’ebé iha relasaun ho emisaun lisensa ambientál sira, garante aplikasaun prinsípiu poluidór-pagadór no sustentabilidade servisu sira ne’ebé presta hosi Autoridade Nasionál Lisensiamentu Ambientál (ANLA, I.P).
“Objetivu mak atu asegura prosesu lisensiamentu ida ne’ebé transparente no efisiente, atu nune’e bele promove responsabilizasaun husi proponente sira projetu nian ba impaktu ambientál husi sira-nia atividade. Taxa ne’ebé define ona varia tuir kategoria projetu nian, haree ba dimensaun potensiál husi impaktu ambientál, nomós faze husi prosedimentu lisensiamentu nian”, nia salienta iha Palásiu Governu, ohin.
Iha sorin seluk, Prezidente ANLA, Maximiano de Oliveira, esplika katak iha faze haat ba implementasaun taxa mak hanesan taxa informativa ne’ebé aplika ba projetu kategoria A, B no C, enkuantu iha lei seidauk fiksa ba kategoria C. Ba projetu hotu ne’ebé kategoria A, B no C tenke selu $50.
Ba taxa avaliasaun ba impaktu ambientál, ne’ebé aplika ba projetu kategoria A selu $500 no B $250. Taxa emisaun lisensa ka simu lisensa ne’e ba projetu kategoria A selu $1.000, kategoria B $500, no faze ikus mak taxa renovasaun ba lisensa ambientál kada tinan rua tenke selu ba projetu kategoria A $1.000 no B $500.
Dirijente ANLA ne’e esplika katak, antes ne’e, seidauk iha tabela ba selu taxa nian, maibé iha lei artigu 4 mensiona kona-ba taxa sira, enkuantu seidauk aplika. “Maibé ita iha sansaun ba kompañia sira ne’ebé la kumpre hanesan fó impaktu ba ambiente ne’e rihun $50 to’o $250”, nia dehan.
Maximiano salienta katak ANLA halo ona sosializasaun ba lei kona-ba taxa nian ba komunidade husi Dili to’o munisípiu sira hodi bele implementa iha tempu badak. “Agora, ami sei reativa informasaun ba postu administrativu iha Dili laran iha semana oin no kontinua ba munisípiu sira hotu”, nia adianta.
Jornalista: Arminda Fonseca
Editora: Maria Auxiliadora
