OEKUSi, 05 fevereiru 2025 (TATOLI) – Tribunál Distritál Oekusi (TDO), kuarta ne,e, aplika ona medida koasaun Termu Identidade Rezidénsia (TIR) ba arguidu na’in-tolu envolve iha kazu asalta malu, ne’ebe akontese iha loron 24 Dezembru 2024, iha aldeia Mahata, suku Costa sub-rejiaun Pante Makasar, Rejiaun Administrativa Espesiál Oekusi Ambenu (RAEOA).
Notísia relevante:PNTL Oé-Cusse aprezenta kazu asalta malu ba Ministériu Públiku
Defensór Públiku, Calisto Totu, ne’ebé fó asisténsia legál ba arguidu na’in tolu ne’e relata tribunál aplika TIR ne’e bazea kodégu prosesu penál Timor-Leste, prevista iha ártigu 146 kona-ba tékniku ninia intervensaun.
Nia dehan dahuluk, tribunál bele lori ema ho kompeténsia atu esplika oinsá averigua no inter-presta faktu. Daruak, tékniku hetan nomeasaun iha despaisu ne’ebé haruka halo dilijénsia no tenke tama iha audénsia julgamentu.
“Ne’ebé prosesu ba kazu asalta malu iha Mahata, depende primeiru interrogatóriu horisehik no ohin rezultadu husi desizaun ne’e, tribunál aplika medida koasaun TIR ba ema na’in-tolu, ho inisiál MQ, VQ no AJC, bazea kodégu penál Timor-Leste artigu 146, katak, krime grave,” nia informa ba jornalista iha TDO, ohin.
Tuir-nia prosesu kontinuasaun husi kazu ne’e maka PNTL ho Ministériu Públiku sei kontinua halo investigasaun profunda ba kazu ne’e no depois Ministériu Públiku mak remete tán akuzasaun ba tribunál hodi halo julgamentu prinsipál, atu determina suspeitu sira ne’e envolve duni iha kazu ne’e ka la’e.
“Tanba ema barak, akontese iha kalan, asalta malu entre grupu ida husi sorin hasoru malu iha klaran, no ema sira-ne’e sai mai, sira rona de’it uma tarutu entaun ita lahatene semak prátika loloos ne’ebé ita hein de’it prosesu tuirmai,” nia dehan.
Notísia relevante:2024, PNTL Oé-Cusse rejista kazu 596 no na’in-11 tama prizaun
Entertantu,sesaun primeiru interrogatóriu ba kazu asaltu malu ne’e preside husi Juiz Administradór Tribunál Primeira Instánsia Oekusi, Benjamin Barros, Ministériu Públiku reprezenta husi Prokuradór, Claudino do Rosário no Defensór Públiku reprezenta husi, Calisto Tout.
Tuir dadus hosi Komandante PNTL Oekusi, Superintendente Polísia, Nicolau Francelino da Costa fó sai katak, kazu asalta malu ne’e akontese iha loron 24 fulan-dezembru 2024 kalan kontinua to’o loron 25 dezembru ka loron natal 2024.
Husi kazu asaltu malu ne’e rezulta joven ida kanek grave no harahun uma rua, maibé Komandu PNTL Eskuadra Pante Makasar hamutuk ho FALINTIL-FDTL halo kedas intervensaun no atuasaun hafoin kazu ne’e akontese.
Komandante PNTL ne’e reforsa, kazu asaltu ne’ebé akontese iha tinan kotuk laiha relasaun ho grupu arte marsiál.
Notísia relevante:Tribunál Oé-Cusse rejista kazu pendente 492, maioria kontrabandu
Jornalista: Abílio Elo Nini
Editór: Florencio Miranda Ximenes
