DILI,08 Fevereiru 2025 (TATOLI)— Vogál II Institutu Kualidade Timor-Leste (IQTL, sigla portugés), Gustavo de Oliveira Maia, informa IQTL sei haruka pesoál na’in-40 ba Nasaun Indonézia hodi tuir formasaun iha área laboratóriu hodibele teste ai-han.
“Rekursu umanu ne’ebé mak ita iha sei haruka bá Indonézia hamutuk 40, iha tinan ne’e,” dehan Gustavo ba Ajénsia TATOLI, I.P, ohin.
Notísia relevante: IQTL prevee rihun $90 ba akizisaun ekipamentu teste ba produtu sira
Nia hatutan: “Prosesu laboratóriu nia fíziku halo hela, maibé ekipamentu mak daudaun ne’e sei hatama mai ne’ebé hetan apoia husi Organizasaun Nasaun Unida ba Dezenvolvimentu Industriál (UNIDO, sigla inglés), ne’ebé ita instala hotu ona atu halo operasaun mak ita seidauk, tanba rekursu umanu ,entaun ida ne’e ita sei haree instala hotu formasaun hotu ona, ita bele uza,” nia konklui.
Molok ne’e, IQTL mós halo ona sosializasaun Dekretu-lei sira ne’e mak númeru 20/2023, kona-ba Sistema Unidade Medida Legál no dekretu-lei númeru 40/2023, kona-ba Rejime Jerál Kontrolu Metrolójiku.
Sensibilizasaun ba dekretu-lei rua ne’e sei hala’o iha munisípiu hotu, inklui Rejiaun Administrativa Espesiál Oé-Cusse Ambeno (RAEOA), ba prezidente autoridade sira no ba setór privadu sira, tanba lei ne’e iha futuru sei implementa ba sira.
Dekretu-lei kona-ba Rejime Jerál Kontrolu Metrolójiku maka, IQTL hamutuk ho jurídiku sira elabora hela rezolusaun Governu nian kona-ba selu taxa nian, katak instrumentu medisaun sasukat hotu-hotu mak utiliza ba fa’an tenke selu taxa ba Estadu.
Ezemplu ba ema sira ne’ebé fa’an ikan uza balansa (dasi) iha merkadu, loja no estasaun kombustível sira, bainhira dekretu-lei ne’e hetan ona aprovasaun sira sei selu taxa ba Estadu bainhira halo kalibrasaun ba sira-nia ekipamentu ne’e.
Notísia relevante: Ekipamentu kalibrasaun ba estabelesimentu laboratóriu nasionál IQTL to’o ona Timor
Jornalista : Feliicidade Ximenes
Editór: Florencio Miranda Ximenes
