OEKUSI, 10 Fevereiru 2025 (TATOLI) – Delegasaun husi Embaixada Koreia súl iha Timor-Leste, segunda ne’e, halo enkontru kortezia ho Prezidente Autoridade Rejiaun Administrativa Espesiál Oekusi Ambenu (RAEOA) atu koordena servisu hodi mellora sentru formasaun lia-koreanu ba joven sira.
“Ohin, ami mai atu ko’alia kona-ba kooperasaun ho Autoridade RAEOA, atu ita haree ba oin sentru Everigreen ne’e bele sai di’ak liutan. Tanba sentru ne’e hetan ajuda husi Embaixadór Koreia súl ho Ajénsia Kooperasaun Internasionál Koreia (KOICA, sigla inglés) hodi destaka ona pesoál voluntáriu hodi hanorin lia-koreanu ba joven sira iha Oekusi, atubele hetan oportunidade bá servisu ba iha Koreia súl,” dehan Konsul husi Embaixada Koreia súl iha Oekusi, Park Hye-ri, ba jornalista sira hafoin ramata enkontru ho Prezidente Autoridade RAEOA, Rogério Tiago Lobato.
Notísia relevante:Edifísiu KOICA iha RAEOA inauguradu
Daudaun Governu Koreia súl liuhusi embaixada loke ona formasaun lia-koreanu iha Oekusi, maibé planu ba futuru bele loke tan sentru formasaun hanesan Taekwondo no sentru kultura.
Iha biban ne’e, Prezidente Autoridade RAEOA, Rogério Tiago Lobato, promete koordena ho Sekretária Rejionál Edukasuan no Asuntu Sosiál hodi bele tau-matan ba sentru formasaun ho nia fasilidade sira, nune’e bele fasilita joven sira aprende lia-koreanu ho di’ak.
“Ne’e inisiátiva di’ak, ha’u foin simu informasaun katak, Oekusi iha sentru formasaun lia-koreanu atu hanorin Oekusi-oan sira. Tan ne’e ha’u sei bolu Sekretária Rejionál Edukasaun no Asuntu Sosiál, tanba sentru ne’e eziste ona ita tenke haree, reforsa no hadi’a di’ak liutan hodi fasilita formasaun ho dignu ba joven sira,” PA RAEOA ne’e promete.
Bazeia ba dadus, sentru formasaun lia-koreanu iha Oekusi loke iha tinan 2022 no to’o agora akumula ona formandu kuaze na’in-50.
Notísia relevante: DIT RAEOA-KOICA inaugura laboratóriu komputadór fasilita kursu gratuita
Jornalista: Abílio Elo Nini
Editór: Florencio Miranda Ximenes
