DILI, 11 fevereiru 2025 (TATOLI)—Arsénio Amaral eleitu sai Xefe suku Poetete Vila, postu administrativu Ermera, munisípiu Ermera, iha eleisaun órgaun suku ronde daruak.
Eleisaun órgaun suku realiza ba dala-tolu ona, ne’ebé ba faze ne’e suku 18 iha munisípiu ualu mak realiza festa demokrasia.
“Eleisaun segundu ronde iha suku Poetete Vila, kandidatu Arsénio Amaral mak sai vensedór ho votu 907 no kandidatu Luís Salsinha Babo ho votu 746,” Diretora Sekretáriu Tékniku Administrasaun Eleitorál (STAE) informa ba Agência Tatoli, via telefónika, tersa ne’e.
Notísia relevante : Kandidatu rua iha Poetete Vila hakat ba eleisaun suku segunda volta
Suku Poetete Vila iha eleitór 2.882, ne’ebé husi númeru ne’e iha eleitór 1.672 mak tuir vota, korresponde taxa partisipasaun 58,01%. Durante kontajen votu iha votu nulu 15 no branku haat.
Fó prioridade ba povu
Iha sorin seluk, Xefe suku eleitu husi Poetete Vila, Arsénio Amaral, agradese ba povu nia konfiansa, nune’e kompromete durante mandatu sei fó prioridade ba povu.
“Iha ha’u-nia kampaña eleitór, halo kompromisu ho povu mak haree no atende povu,” nia tenik.
Aleinde ne’e, Autoridade suku ne’e kompromete sei halo kooperasaun di’ak ho autoridade postu no munisípiu hodi implementa programa ruma husi Governu sentrál iha suku, ne’ebé ba duni povu hanesan uma dignu, estrada, bee-moos no seluk tan.
“Durante mandatu sei la husik povu, ha’u sei atende ho di’ak tuir ha’u-nia kbiit ne’ebé iha hodi nune’e bele hadi’a povu nia moris, tau-atensaun ba infraestrutura bázika hanesan estrada, bee-moos no seluk tan hodi hala’o koordenasaun ho autoridade postu to’o munisípiu no Governu sentrál hodi bele tau-atensaun,” nia kompromete.
Arsénio Amaral nota, iha suku ne’e, problema prinsipál mak estrada ladi’ak no asuntu sosiál sira seluk.
Nune’e, Autoridade suku hakarak tau-atensaun liuhusi Programa Nasionál Dezenvolvimentu Suku (PNDS) hodi hadi’a estrada ho eskala kiik iha aldeia laran.
Xefe Suku eleitu mós iha programa ba juventude sira, hanesan realiza atividade desportu hanesan futeból ho seluk tan hodi kria pás no armónia entre joven sira iha suku, sei halo kooperasaun ho parseiru realiza formasaun lian inglés no portugés ho seluk tan ba joven sira.
Governu liuhusi Ministériu Administrasaun Estatál (MAE) ho koordenasaun ho STAE iha loron 10 fevereiru realiza eleisaun órgaun suku ba ronde daruak, iha suku Poetete Vila no Poetete Lodudu iha munisípiu Ermera.
Poetete Lodudu, postu Ermera, kandidatu Eurico de Jesus Soares mak eleitu ho votu 426 no kandidatu Daniel Soares ho votu 297, rejista votu nulu 16 no branku sia. Suku ne’e rejistu eleitór 1.185 no eleitór tuir votab748 korresponde taxa partisipasaun 63,12%.
Jornalista : Nelson de Sousa
Editora : Julia Chatarina
