DILI, 11 fevereiru 2025 (TATOLI)—Diretór Polísia Sientífika Investigasaun Kriminál (PCIC, sigla portugés), Vicente Fernandes e Brito, hateten investigadór PCIC ho inisiál OA ne’ebé envolve iha kazu osan ba fujitivu Arnolfo Teves Jr nia oan iha tinan kotuk agora daudaun seidauk bele retoma nia funsaun hanesan investigadór tanba sei kumpre sansaun disiplinár durante tinan ida.
“Nia (OA) seidauk tama servisu. Nia suspendidu tinan ida. Ninia direitu regalias laiha. Oras ne’e, nia la halo funsaun hanesan baibain. Ninia atu ne’e grave,” Vicente hateten ba jornalista TATOLI iha nia kna’ar fatin, Colmera, Dili, tersa ne’e.
Vicente esplika katak nia seidauk bele tama fali servisu tanba bainhira membru ne’e komete sansaun disiplinár, entaun Diretór PCIC informa kedas ba Komisaun Funsaun Públika para halo suspensaun ba nia saláriu.
Notísia relevante: PCIC estende tán averiguasaun ba oknum husu osan ba sidadaun filipinu
“Ha’u-nia desizaun ne’e remete kedas ba funsaun públika no ha’u komunika imediatu ba funsaun públika, depois funsaun públika halo karta ba peiról korte nia saláriu komesa husi fulan ida-ne’ebé ita aplika sansaun disiplinár ne’e to’o nia prazu determina,” nia adianta.
Vicente tenik oknum Polísia Sientífika Investigasaun Kriminál ne’e nia atu ne’e grave tanba ne’e PCIC deside dezarma tiha nia inklui foti tiha nia kartaun ID.
“Ha’u rejeita boatu sira ne’ebé iha li’ur katak oknum PCIC servisu fali ona. Ne’e laloos no membru ne’e sei kumpre sansaun disiplinár ne’ebé aplika ba nia,” nia esklarese.
Antes ne’e, pesoál Investigadór PCIC referidu ho lian inglés kontatu via WhatsApp ho Arnolfo Teves Jr nia oan mane kona-ba nia aman nia kondisaun iha estabelesimentu Prizionál Becora Dili. Iha kontatu ne’e pesoál PCIC husu osan ba Arnold nia oan mane ho montante $2.000 nu’udár osan atu seguransa ba Arnolfo Teves Jr iha prizaun.
Rekorda mós katak sidadaun Filipinu ho naran Arnolfo Teves JR molok ne’e, iha kinta 22 fulan-Marsu 2024, autoridade PCIC halo detensaun internasionál bainhira sidadaun ne’e halimar hela Golf iha área Metiaut, Cristo Rei nian.
Autoridade PCIC detein sidadaun Filipinu ne’e tanba autór inteletuál ba krime asasinatu iha Filipina hodi oho Governadór ida iha Filipina, tan ne’e sidadaun ne’e sai fujitivu no autoridade PCIC kaptura iha Dili.
Jornalista: Natalino Costa
Editór: Xisto Freitas da Piedade
