DILI, 13 Fevereiru 2025 (TATOLI) – Ekipa Telkomcel enkontru, ohin, ho Primeiru-Ministru (PM), Xanana Gusmão, hodi hato’o konvite atu partisipa iha Simeira Internasionál kona-ba Teknolojia, Kultura no Turizmu ne’ebé sei realiza iha loron 27 Fevereiru ne’e.
Ekipa Telkomcel ne’e lidera husi Diretór-Ezekutivu Telkomcel iha Timor-Leste, Benedictus Adriyanto, ne’ebé akompaña husi Embaixadór Indonézia, Okto Dorinus Manik.
Diretór-Ezekutivu Telkomcel hateten Peimeiru-Ministru simu konvite no disponivel atu halo abertura ba Simeira ne’e no sei fó perspetiva kona-ba futuru konetividade no dijitalizasaun, tanba durante tinan 12 hala’o operasaun no serví povu Timor-Leste ho domin.
Benedictus Adriyanto afirma katak sira kompromete atu hola parte iha programa Governu nian hodi reforsa papél sosiál no aselera transformasaun dijitál inkluziva iha Timor-Leste.
“Obrigadu ba konfiansa husi povu no Governu durante tinan 12 nia laran. Ami sente orgullu hodi partisipa iha dezenvolvimentu Timór nian, nomeadamente aselera transformasaun dijitál ne’ebé bele iha impaktu pozitivu”, nia hateten iha Palásiu Governu, ohin.
Dirijente ne’e dehan Telkomcel kontinua halo investimentu adisionál ne’ebé konsideravel, espesiálmente durante tinan tolu ikus hodi halo modernizasaun ba infraestrutura telekomunikasaun no dijitalizasaun.
“Ida-ne’e la’ós de’it mellora kualidade servisu, maibé mós forma fundasaun forte atu realiza vizaun Governu Timor-Leste ba dezenvolvimentu ekonomia dijitál neʼebé kompetitivu no hatudu seriedade Telekomunikasaun Indonézia International S.A iha prosesu dezenvolvernentu ida-ne’e”, nia dehan.
Telkomcel fiar katak futuru Timor-Leste iha timoroan sira-nia liman, tanba ne’e funsionáriu Telkomcel 95% mai husi jerasaun joven Timor-Leste ho maioria idade entre 20 no 35, ba pozisaun jestór nian mós okupa 75% husi talentu di’ak sira.
“Ho orgullu liután, 50% nu’udár feto, reflete kompromisu Telkomcel ba igualdade jéneru no empoderamentu feto. Telkomcel mós fó atensaun ba dezenvolvimentu talenta lokál hodi fó bolsa estudu no programa dezenvolvimentu lideransa ba funsionáriu sira atu kontinua edukasaun sira ba nivel lisensiatura no mestradu”, nia adianta.
Husi kolaborasaun ho Telkom University (Tel-U) estudante selesianadu iha Timor-Leste mós iha oportunidade atu estuda iha rai-li’ur ho aprendizajen tuir padraun internasionál.
Totál empregadu Telkomcel na’in-neen ne’ebé predikadu nu’udár “Best Employee” husi Telin HQ Jakarta no ba estuda iha universidade hitu di’ak liu iha mundu hanesan Harvard, Stanford, Wharton & MIT.
Nia akresenta katak atu habelar impaktu sosiál no halo ambiente serbisu neʼebé inkluzivu, Telkomcel la konsentra de’it iha dezenvolvimentu profisionál, maibé fó mós atensaun ba moris di’ak funsionáriu sira-nia.
Hanesan empreza telekomunikasaun, Telkomcel kontinua konvida atu fó impaktu sosiál ba komunidade, husi ne’e, valór importante ba impaktu sosiál aumenta hanesan referénsia iha atividade interna no esterna.
“Programa viajen servisu espirituál no inisiativa atu halo Uma Domin – Go Shine mak evidénsia klaru ba kompromisu Telkomcel. Ho espíritu ‘Família Unidade’, Telkomcel komprometidu atu kria ambiente traballu inkluzivu, armonia no suportivu”, nia konklui.
Jornalista: Arminda Fonseca
Editora: Maria Auxiliadora
