DILI, 14 Fevereiru 2025 (TATOLI)—Ministru Justisa, Sergio Hornai hateten PCIC halo ona averiguasaun hasoru oknum ne’ebé uza arma tiru joven iha Delta 4, sábadu (8/2/2025).
“Sira halo hela averiguasaun. Ha’u hanoin ita-boot sira akompaña nafatin,” Hornai hateten ba jornalista sira hafoin serimónia atribuisaun ekipamentu iha Salaun Ministériu Justisa, Kolmera, sesta ne’e.
Iha sorin seluk, Portavóz Polísia Sientífika Investigasaun Kriminál (PCIC-sigla portugés), Investigadór Seniór, Mario Tavares, hateten prosesu ba oknum PCIC ne’ebé uza arma tiru joven iha Delta 4 ne’e konfirmadu la’o hela.
Notísia relevante: Oknum PCIC suspeitadu ba kazu tiru sidadaun na’in tolu
“Ha’u foin konfirma katak agora sei iha faze rekolla informasaun. Membru ne’e dezarmadu tiha ona. Nia agora la lori ona arma,” nia informa.
Rekorda fali katak, antes ne’e, oknum PCIC ho inisiál FMG suspeitadu uza arma tiru sidadaun na’in tolu iha área Delta 4, aldeia Aimeti-Laran, suku Comoro, postu Administrativu Dom Aleixo, munisípiu Dili, sábadu (8/2/2025), tuku 01:30 Otl.
Tuir kronolojia, oknum PCIC ho inisiál FGM uza arma tiru dala rua ba joven na’in tolu hanesan Salvador Leitão Belo Ximenes (17), Adérito Plácido Moreira (17) no Abílio Alberto Soares Carlos (17).
Bainhira ema na’in tolu ne’e fa’an hela iha área Delta 4, derepente oknum PCIC ho inisiál FMG ho pistola hakbesik ba iha sidadaun na’in tolu ne’e hodi dehan “mangame tiru tiha imi”. FMG tiru duni dala rua bá leten. Ho atu ne’e, sidadaun na’in tolu hakfodak no halai fahe malu bá subar iha abitante balun nia uma iha Gan 1 nú. 3, área Delta 4 nian.
Haree ba hahalok oknum PCIC nian ne’e, joven na’in tolu trauma no presta kedas keixa bá Departamentu Investigasaun Kriminál (DIK) Nasionál Komandu Jerál PNTL. Hafoin sidadaun na’in tolu ne’e presta tiha deklarasaun iha DIK, Departamentu Investigasaun Kriminál Nasionál rejista kedas kazu ne’e ho númeru NUC 0047/25/PNSIC no kazu ne’e submetidu ona bá Ministériu Públiku.
Jornalista: Natalino Costa
Editór: Xisto Freitas da Piedade
