DILI, 17 Fevereiru 2025 (TATOLI)—Diretór Jerál Terra Propriedade (DGTP-sigla portugés), Lúcas António da Costa, hateten Diresaun Jerál Terra Propriedade durante ne’e rejista arrendatária hamutuk 50 mak la selu arrendamentu ba Estadu, nune’e DGTP submete ona bá Ministériu Públiku (MP) atu kriminaliza.
Notisia relevante: MJ sei kriminaliza empreza ne’ebé la selu arrendamentu ba Estadu
Nia dehan, husi arrendatáriu sira ne’ebé la selu arrendamentu rai no uma Estadu ne’e iha empreza nasionál balun no empreza internasionál balun.
“Empreza nasionál no internasionál balun ha’u la lembra nia númeru, más ha’u atu dehan de’it katak sira-ne’e durante ne’e uza rai Estadu la selu taxa. Kuandu la selu taxa ne’e krime,” Lúcas hateten ba TATOLI iha nia kna’ar fatin, Kolmera, segunda ne’e.
Nia haktuir katak empreza sira ne’ebé la selu arrendamentu agora nia prosesu iha Ministériu Públiku hela.
Rekorda fali katak, molok ne’e, VIII Governu Konstitusionál liuhusi Ministru Justisa, Tiago Amaral Sarmento, hateten Ministru Justisa deteta empreza nasionál no internasionál hamutuk 20 mak durante ne’e la selu taxa arrendamentu uma no rai Estadu. Enkuantu iha empreza 10 mak arrenda tutan rai Estadu.
Relasiona ho kontratu arrendamentu sira-ne’ebé uza uma no rai Estadu, uza lei númeru 01/2003, 10 Maiu, no nia implementasaun utiliza dekretu-lei númeru 19/2004, 29 Dezembru.
Jornalista: Natalino Costa
Editór: Xisto Freitas da Piedade
