DILI, 18 Fevereiru 2025 (TATOLI)—Komandante Jerál Polísia Nasionál Timor-Leste (PNTL), Komisáriu Jerál Polísia Henrique da Costa, solisita Sekretaria Estadu Komunikasaun Sosiál (SEKOMS) atu envolve membru PNTL iha formasaun mídia nune’e bele eleva membru sira-nia koñesimentu iha área jornalístika.
“Bainhira iha formasaun ba mídia, bele envolve mós ofisiál mídia PNTL iha laran hodi tuir formasaun kona-ba hakerek imprensa ho di’ak tanba PNTL eziste Gabinete Relasaun Públika. Nune’e, kuandu sira tuir formasaun mídia nian sira bele hakerek ho di’ak no hasai foto ho di’ak hodi tau iha pájina ofisiál PNTL nian atu komunidade bele akompaña atividade PNTL,” Henrique hateten ba jornalista sira iha kna’ar fatin, edifísiu Kuartél Jerál PNTL, Kaikoli, tersa ne’e.
Tuir nia, durante ne’e ofisiál mídia PNTL sira barak seidauk hetan formasaun kona-ba hakerek imprensa.
Notísia relevante: SEKOMS lansa formasaun unidade ualu
“Ita iha mídia PNTL iha munisípiu sira, maibé sira la hetan formasaun jornalístika. Entaun, sira labele hakerek atividade hotu-hotu ne’ebé PNTL sira halo iha munisípiu no unidade sira para públiku akompaña direta ho di’ak,” nia haktuir.
Iha fatin hanesan, Sekretáriu Estadu Komunikasaun Sosiál, Expedito Loro Dias Ximenes, rekoñese katak formasaun sira ne’ebé durante ne’e SEKOMS realiza sempre envolve ofisiál mídia iha instituisaun Estadu hotu, maibé parte PNTL mak la partisipa tanba sira la hetan konvite.
“Agora formasaun faze daruak, ami sei konvida ofisiál mídia relasaun públika PNTL nian para tuir formasaun nune’e sira bele hakerek imprensa ho di’ak,” governante ne’e promete. .
Jornalista: Natalino Costa
Editór: Xisto Freitas da Piedade
