DILI, 17 Fevereiru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes, segunda ne’e, ofisialmente lansa formasaun unidade ualu ne’ebé sei hala’o nia formasaun iha fulan ida-ne’e.
Formasaun unidade ualu ne’e kompostu husi Lian Portugés ba jornalizmu, unidade Lian Tétun ba jornalizmu, unidade rádiu, unidade multimedia, unidade televizaun, unidade komunikasaun relasaun públika no protokolu inklui unidade jestaun krize.
Diretór Nasionál Formasaun Téknika Komunikasaun Sekretaria Estadu Komunikasaun Sosiál (SEKOMS), Júlio Lopes hateten formasaun referida sei responsabiliza husi Sentru Formasaun Téknika Komunikasaun (CEFTEC-sigla portugés) ho partisipante hamutuk ema na’in 200.
Nia esplika katak durasaun formasaun ne’e ba unidade rádiu, televizaun inklui unidade sira seluk ne’e durante fulan rua, maibé unidade multimedia ba fulan neen.
“Diresaun ida-ne’e estabelese iha tinan barak nia laran atu kapasita ita-nia maluk timoroan iha liña ministeriál sira no setór privadu. La taka dalan mós ba timoroan sira ne’ebé ramata ona ensiñu sekundáriu no ensiñu superiór,” Júlio hateten ba TATOLI iha Palácio do Governo, segunda ne’e.
Iha fatin hanesan, Sekretáriu Estadu Komunikasaun Sosiál, Expedito Loro Dias Ximenes hateten formasaun ne’e importante ba funsionáriu no ba ajente Estadu sira.
Nia haktuir katak mundu ohin loron tama ona ba dijitalizasaun, tan ne’e ema hotu bele partilla informasaun iha facebook liuhusi telemóvel no agora la’ós ona jornalista mak bele hakerek notísia maibé nitizen mós bele.
“Tanba ne’e, ita atu hekerek informasaun ka notísia ruma presiza liuhosi fomasaun sira hanesan ne’e atu eleva ita-nia koñesimentu,” nia informa.
Expedito husu ba formandu sira tenke aproveita didi’ak oportunidade ida-ne’e atubele sai ema ne’ebé kapasitadu nune’e bele ajuda mellora servisu insitituisaun.
Jornalista: Natalino Costa
Editór: Xisto Freitas da Piedade
