DILI, 19 Fevereiru 2025 (TATOLI)—Tribunál Judisiál Primeira Instánsia Dili (TJPID), kuarta ne’e, kontinua halo julgamentu ba kazu José Bernardo ne’ebé mate iha sela Komandu Polísia Nasionál Timor-Leste (PNTL), Kaikoli, iha tinan 2022.
Iha audiénsia julgamentu ne’e, Tribunál rona depoimentu husi arguidu Tomás Punef ne’ebé mak nu’udár membru PNTL ne’ebé momentu ne’ebá lori José Bernardo bá entrega iha sela detensaun.
Iha sala julgamentu, arguidu Tomás deklara katak momentu ne’e nia nu’udár investigadór iha Komandu Polísia Eskuadra Vera-Krúz, no momentu iha dia 30 Setembru 2022 dadeer nia simu keixa ida husi vítima Gaudencio nia bin ho naran Verdiana heteten katak mosu konfrontu ida iha aldeia 01, suku Kaikoli no konfrontu ne’e rezulta nia alin suspeitu sira baku to’o grave.
“Momentu ne’e, ha’u simu keixa husi vítima Gaudencio nia bin katak nia alin ema baku to’o grave no baixa kedas iha ospitál nasionál no suspeitu ne’ebé baku vítima ne’e, nia koñese hotu. Entaun, momentu ne’e ha’u rejista tiha kazu ne’e no husu autorizasaun husi Komandante Polísia Eskuadra Vera-Krúz hodi hakle’an prosesu ne’e,” Tomás Punef deklara iha TJPID, Kaikoli.
Notísia relevante: Tribunál halo julgamentu foun ba kazu José Bernardo nia mate
Arguidu konfesa bá Tribunál katak momentu ne’e Komandante Polísia Eskuadra Vera-Krúz autoriza nia hodi kontinua halo prosesu ba kazu ne’e.
Nune’e, momentu ne’ebá arguidu ho karreta patrullamentu bá kedas haree kondisaun vítima Gaudencio iha ospitál. Momentu nia haree duni vítima Gaudencio hala’o hela tratametu no nia filamai Polísia Eskuadra Vera-Krúz hodi kontinua husu autorizasaun bá Komandante Eskuadra Vera-Krúz hodi lori supeitu José Bernardo mai tuir prosesu identifikasaun.
Nune’e, iha loron 30 Setembru tuku 12:00 Otl, arguidu Tomás Punef dezkola kedas bá suspeitu José Bernardo nia uma hodi lori suspeitu José Bernanrdo submete bá prosesu identifikasaun.
Arguidu haktuir, momentu lori suspeitu husi nia uma mai submete bá prosesu identifikasaun iha Polísia Eskuadra Vera-Krúz, akompañadu husi suspeitu nia inan inklui sasin na’in rua husi Gaudencio nian.
Arguidu hateten, momentu iha prosesu identifikasaun, arguidu nia inan mós akompaña hotu José Bernardo.
“Momentu halo identifikasaun bá José Bernardo, ha’u la halo identifikasaun, maibé ha’u-nia xefe investigasaun mak halo no ha’u akompaña de’it. Momentu halo identifikasaun, José Bernardo nia inan mós hein hotu iha sala espera hodi akompaña nia oan,” nia lembra.
Arguidu hatutan, hafoin halo tiha identifikasaun bá José Bernardo, xefe investigadór orienta nia lori suspeitu José Bernardo bá sela detensaun Komandu PNTL Kaikoli.
“Polísia Eskuadra Vera-Krúz laiha sela, entaun ami tenke lori suspeitu bá sela detensaun Komandu PNTL Dili. Momentu ami lori José Bernardo bá sela, nia inan mós akompaña hotu,” nia haktuir.
Arguidu deklara katak, momentu ne’e, nia entrega José Bernardo bá Tomás Viegas hodi asegura José iha sela detensaun durante oras 12 nia laran.
“Momentu ami halo identifikasaun bá suspeitu, ami la ameasa nia. Nein ko’alia liafuan oinoin bá nia (suspeitu) to’o ha’u lori mai entrega bá Tomás Viegas hodi asegura nia iha sela durante oras 12 nia laran. Momentu ha’u mak bá entrega José Bernardo bá Tomás Viegas duni no ha’u haree José Bernardo nia kondisaun di’ak, sein trauma ba buat ruma. Hakarak hateten tan katak momentu ne’e nia sei ko’alia hela ho nia inan iha fatin besik sela nian. Depoizde ida-ne’e, ha’u fila ona,” nia esplika.
Arguidu rekoñese katak momentu asegura suspeitu José Bermardo iha sela detensaun durante oras 12, la komunika bá Ministériu Públiku.
Arguidu Tomás Punef fó razaun tanbasá polísia asegura José Bernardo iha sela detesaun. Razaun tanba haree ba krime ne’ebé mak José Bernardo komete ne’e todan tanba suspeitu ninia hahalok ne’e rezulta ema kanek todan to’o baixa. Ho sirkunstánsia sira-ne’e mak polísia halo detensaun ba suspeitu.
“Ami asegura nia iha sela, tanba gravidade krime ne’ebé mak José Bernardo komete no ami rona katak kuandu suspeitu filafali bá uma sei akontese konfrontu boot liután, tanba ne’e mak ami asegura suspeitu iha sela. Kuandu situasaun kontroladu ona mak haruka nia fila,” nia esplika.
Arguidu Tomás hateten tuku neen atu bá tuku hitu kalan nia simu informasaun husi nia maluk polísia ida katak suspeitu ne’ebé ohin sira halo identifikasaun ne’e hakotu ona iis (mate), nune’e nia bá kedas Komandu PNTL Dili hodi haree maibé momentu nia to’o ne’e ema barak tiha ona no la konsege bá haree José Bernardo nia isin-mate.
Hafoin rona tiha deklarasaun arguidu Tomás Punef, Tribunál marka fali julgamentu bá loron 27 Fevereiru 2025 tuku 14:00 Otl, hodi kontinua rona deklarasaun husi arguidu Tomás Viegas.
Audiénsia julgamentu ne’e prezide husi juíz koletivu hanesan José Escrião, Afonso Carmona no Francisca Cabral, Ministériu Públiku reprezenta husi prokuradór Adérito Tilman, arguidu sira hetan asisténsia legál husi defensór públiku Estaqui Guterres no Juvinal Yenes Freitas. Enkuantu, José Bernardo hetan asistidu husi Adelina no Elídio.
Jornalista: Natalino Costa
Editór: Xisto Freitas da Piedade
