DILI, 20 Fevereiru 2025 (TATOLI)—Xefe Suku Kuluhun, Deus Dado Martins, hateten uma hamutuk 36 iha aldeia tolu iha suku Kuluhun mak hetan despeju administrativu husi governu liuhusi Sekretaria Estadu Asuntu Toponímia no Orgaizasaun Urbana (SEATOU).
Despeju administrativu ne’e hala’o ona iha iha 17 Fevereiru liubá, hafoin iha 9 Fevereiru iha konkordánsia konjunta entre populasaun afetadu sira no Terra Propriedade, Ministériu Obra Públika (MOP) no SEATOU liuhusi enkontru, iha suku Kuluhun, Postu Administrativu Kristu-Rei, Dili.
Deus haktuir katak maski daudaun ne’e governu sobu ona, maibé to’o agora populasaun sira ne’ebé sai na’in ba uma 36 referida seidauk hetan buat ida husi Governu, liuliu pagamentu indemnizasaun.
“To’o agora sira seidauk hetan. Ha’u husu ba populasaun sira tenke mantein hein, tanba buat ne’ebé ita ko’alia ne’e lalais, maibé prosesu administrativu ne’e kle’ur. Governu sei la haluha. Buat hotu governu sei fó,” nia afirma.
Nia informa katak agora daudaun xefe suku no xefe aldeia sira halo hela sosializasaun ba sidadaun referida atu prepara dokumentu importante sira hanesan dokumentu rai nian, deklarasaun husi xefe suku, eleitorál, billete identidade no ikus mak konta bankaria, atu submete bá Ministériu Obra Públika (MOP) para prosesa pagamentu.
Notísia relevante: Montana Diak hahú sobu uma ba alargamentu estrada Kuluhun-Bekora
“Ita hotu hein banhira loos mak kompensasaun ruma tama ona iha bankária, ekipa sira sei mai fali iha sede suku nune’e xefe suku no xefe aldeia sira fahe fali informasaun bá populasaun sira ne’ebé mak afetadu ba alargamentu Estrada husi Kuluhun ba Fatuahi.
Sidadaun hirak-ne’e pertense ba aldeia tolu hanesan aldeia Toko-Baru, Funu-Hotu no aldeia Loe-Laco.
Líder komunitáriu ne’e esplika katak husi uma 36 ne’e, abitante sira ne’ebé hela iha rai Estadu liuliu iha aldeia Toko-Baru II hamutuk 21, baraka-oan 12 no uma privada iha tolu.
Entretantu, suku Kuluhun iha aldeia hitu hanesan Funu-Hotu, Lao-Rai, Loe-Laco, Nato, Sorumutu ba Dame, Tane-Mutu no Toko-Baru II, totál populasaun hamutuk 10.311.
Jornalista: Felicidade Ximenes
Editór: Xisto Freitas da Piedade
