DILI, 20 Fevereiru 2025 (TATOLI)—Sekretáriu Estadu Komunikasaun Sosiál, Expedito Loro Dias Ximenes asina kontratu ho mídia konvensionál lima atu kontinua distribui jornál bá munisípiu, nune’e povu bele akompaña atividade ne’ebé governu hala’o iha Timor-Leste.
Mídia konvensionál lima ne’ebé asina kontratu ho Sekretaria Estadu Komunikasaun Sosiál (SEKOMS) mak hanesan Jornál Suara Timor Lorosa’e (STL), Jornál Independente, Jornál Timor Post, Jornál Dili Post no Jornal Nacional Diário.
Orsamentu ba kontratu ne’ebé SEKOMS selebra ho mídia konvensionál lima iha tinan ne’e $120.000, ho durasaun Marsu to’o Outubru. Iha tinan kotuk, 2024, ho montante $192.000.
Sekretáriu Estadu Komunikasaun Sosiál, Expedito Loro Dias Ximenes, hateten SEKOMS mai asina kontratu kooperasaun entre mídia konvensionál lima iha área imprensa ninian ne’ebé asina ona.
“Programa ida-ne’e nu’udár programa IX Governu nian ne’ebé hala’o tiha ona iha tinan 2023, 2024 no ohin ita asina tan ho mídia lima ne’e atubele hala’o distribuisaun jornál bá iha munisípiu sira,” Expedito hateten ba jornalista sira hafoin asina akordu iha salaun Prezidénsia Konsellu Ministru (PCM-sigla portugés), Palácio do Governo, kinta ne’e.
Notísia relevante: SEKOMS asina akordu ho mídia imprime lima distribui jornál ba munusípiu
Governante ne’e esplika, kontratu ne’ebé SEKOMS asina ona ho mídia lima ne’e ezemplár 100 ba kada mídia, maibé tinan kotuk (2024) ezemplár 180 no tinan 2023 ezemplár 184.
“Loos duni, iha redusaun. Tinan 2025, iha redusaun osamentu ba distribuisaun jornál,” nia klarifika.
Expedito haktuir katak durante ne’e ekipa téknika halo avaliasaun ba polítika Governu nian ba programa distribuisaun jornál katak komunidade maioria hateten presiza nafatin jornál atu lee.
Iha fatin hanesan, Diretór Jornál Independente, José Sarito Amaral, agradese ba Governu tanba selebra tan kontratu distribuisaun jornál bá munisípiu sira.
“Ha’u sempre agradese ba Governu liuhusi SEKOMS ne’ebé kontinua fó atensaun másima ba mídia konvensionál sira,” nia agradese.
Nune’e mós, Diretór Jornál Diáriu Timor Post, Jacob Ximenes, hateten polítika ida-ne’e hanesan responsabilidade ida atu asumi hodi hatutan informasaun ba sosiedade iha baze.
“Mezmuke iha difikuldade barak ne’ebé ami sei hasoru iha ne’ebá hanesan mós tinan kotuk, maibé lahamate ami-nia hakarak. Ami-nia objetivu importante jornál bele to’o iha komunidade,” nia konklui.
Jornalista: Natalino Costa
Editór: Xisto Freitas da Piedade
