DILI, 24 Fevereiru 2025 (TATOLI)-Eventu jogu entre Komunidade Nasaun ko’alia dalen-portugés (CPLP, sigla portugés) ne’ebé sei akontese iha Timor-Leste parte ida hodi dezenvolve desportu rai-laran.
“Internalmente hakarak kontribui, dezenvolve desportu iha Timor, husi desportu baze to’o labarik sira iha eskola, no mós hakarak to’o desportu kompetitivu, Timor bele kompete iha nivel internasionál hanesan durante ne’e kompete”, Reprezentante Ekipa Komisaun Tékniku Apoiu, Jorge Cesar de Carvalho, hatete iha salaun Ministériu Juventude Desportu Arte no Kultura, segunda ne’e.
Jorge informa membru 800-resin inklui bainaka mak sei partisipa. Jogu ida ne’e sei asosia ho turizmu.
“Joven barak prátika desportu no feto mós prátika, nune’e iha dezenvolvimentu la’ós de’it iha desportu, maibé dezenvolvimentu iha área ekonómika, área turizmu no sosiál”, nia dehan.
Sekretáriu Estadu Arte no Kultura (SEAK), Jorge Soares Cristovão, hatete delegasaun Komisaun Tékniku Apoiu (STA) ne’ebé mak mai observa preparasaun sira ba jogu CPLP.
“Ohin ami halo aprenzentasaun hahú kedas rezolusaun governu nian ne’ebé hatudu katak governu kompromete apoiu jogu CPLP ne’ebé mak Timor-Leste nu’udar uma na’in”, dehan nia.
Jogu ne’e adia iha 2020 tanba korona virus. “Sorumutu ohin ne’e sira haree oinsá ita-nia preparasaun ho ita-nia federasaun sira. Sira prontu apoiu formasaun rekursu ba tékniku sira para mellora atividade”, katak nia.
Nia dehan, sekretáriu CPLP mós prontu apoiu modalidade Xadres, tanba Timor presiza utiliza materiál elektrónika ba konta.
Biban ne’e mós sira rekomenda fasilita formasaun ba modalidade atletismu. “Ita-nia preparasaun ida mak estádiu munisipál Dili, tanba sei halo abertura no jogu futebol sei halo iha ne’ebá. Múzika ba jogu CPLP mak nós somos um, ne’ebé mak ita prepara ona no tempu badak sei públika, ida-ne’e artista Timoroan mak sei kanta”, tenik.
Aban, ekipa sei enkontru kortezia ho Ministru Interiór, Ministra saúde, Ministru Transporte no Telekomunikasaun.
Notísia relevante: Jogu CPLP: membru CTA no diretór CPLP sira vizita Timor-Leste
Jornalista : Osória Marques
Editora : Rita Almeida
