DILI, 26 Fevereiru 2025 (TATOLI)-Ministru Asuntu Kombatente Libertasaun Nasionál (MAKLN), Gil da Costa Monteiro Oan Soru, informa Tribunál Judisiál Primeira Instansia hatún ona desizaun atu JTL devolve osan Estadu ho valor $33.180 tanba falsifika dadus veteranu.
Kazu falsifikasaun dadus veteranu ne’e rejísta ho Númeru Úniku Kríme (NUK) 011420. “Durante ne’e públiku tomak sempre ezíje hela tuir lei ne’e saida-saida mak ita-boot sira halo, no halo oinsá. Entaun, ami nia prosesu mak ida-ne’e. Desizaun hotu-hotu ne’e interligadu ho lei, ho prosesu penál sira ne’ebé mak vigora iha ita-nia Nasaun atu aplika ba sidadaun”, dehan Oan-Soru iha ninian knar fatin Komoro, tersa ne’e.
Hanesan membru governu ba asuntu ne’e, nia dehan sempre iha koñesimentu atu transmite ba públiku konaba prosesu sira no andamentu hasoru ema sira ne’ebé suspeitu ba kazu falsifikasaun dadus veteranu.
Governante ne’e haktuir, kondenadu JTL rejistu iha 2003, husi Ainaru no simu pensaun mensál (8a14). Nune’e, desizaun tribunál nian tenke fó filafali osan Estadu ne’ebé durante ne’e simu.
Kazu hanesan ne’ebé akontese iha Kovalima, nia husu atu kontinua akompaña prosesu sira ne’ebé la’o daudaun husi parte Polísia Nasionál Timor-Leste (PNTL), Departamentu Investigasaun Kriminál Nasionál.
“Prosesu sira hotu la’o hela iha ministériu públiku, ita-boot sira hetene KAK, PSIK, ne’ebé, husik sira la’o to’o ninia rohan ona mak foin bele pronúnsia. Hanesan Ministru, nunka bele halo pronunsiamentu antesipada ida kona-ba buat ida ne’ebé mak ita seidauk to’o ninia rohan”, dehan.
Notísia relevante: Kombatente na’in-11 sei devolve rihun-$301 ba Estadu tanba falsifika dadus
Jornalista : Osória Marques
Editora : Rita Almeida
