DILI, 28 Fevereiru 2025 (TATOLI)—Tribunál Judisiál Primeira Instánsia Dili (TJPID), sesta ne’e, kontinua halo julgamentu ba kazu José Bernardo nia mate iha sela Komandu PNTL Dili, tinan 2022.
Ajenda ba julgamentu ne’e, Tribunál rona depoimentu husi arguidu Tomás Tavares nu’udár membru PNTL ne’ebé hein sela Komandu Polísia Nasionál Timor-Leste Munisípiu Dili.
Iha sala julgamentu, arguidu deklara katak nia halo funsaun hanesan hein sela iha Komandu PNTL Dili dezde tinan 2008 to’o 2022.
“Ha’u halo kna’ar hein sela ne’e dezde 2008 to’o 2022 mak foin para,” Tomás Tavares deklara iha sala julgamentu TJPID, Kaikoli.
Arguidu esplika, momentu ne’e nia mak simu duni arguidu José Bernardo hodi bá asegura iha sela 12 horas de tempo.
Arguidu hatutan, momentu ne’e la’ós atu detein José Bernardo, maibé asegura de’it iha sela 12 horas de tempo.
Notísia relevante: Tribunál kontinua julga kazu José Bernardo nia mate iha sela
“Durante ne’e la’ós ba kazu José Bernardo nia mak halo hanesan ne’e, maibé haree ba kazu ne’ebé sidadaun ida komete todan no fó ameasa ba sidadaun ne’e nia vida, entaun bainhira polísia halo tiha identifikasaun, lori sidadaun ne’e bá asegura iha sela referida to’o hein situasaun kontrolada mak foin husik fali,” nia haktuir.
Arguidu hateten, ba kazu José Bernardo nia ne’e grave tanba rezulta ema kanek todan to’o baixa iha ospitál, nune’e hafoin halo tiha identifikasaun ba nia (José), polísia labele husik livre tanba haree ba sirkunstánsia ne’ebé temi ona.
Arguidu informa katak momentu ne’e nia lori José Bernardo bá sela ne’e, José Bernardo iha kondisaun ne’ebé di’ak tanba iha fatin ne’ebé aseguradu, livremente bele la’o bá-mai, lahanesan ho sela detensaun oras 72 nian.
“Momentu ne’e nia konversa ho ha’u, no ha’u lori nia bá ne’e nia laiha ta’uk no trauma. Ami rua konversa di’ak no kondisaun saúde laiha problema. To’o tuku neen loraik ha’u haree buat hotu di’ak, nune’e ha’u sai bá fuma tama fali mai, derepente José Bernardo tara aan ona. Nune’e, ha’u kontatu kedas bá sentru informasaun Komandu PNTL munisípiu Dili hodi relata kazu ne’e,” nia tenik.
Arguidu hateten iha sela ne’e iha duni fiu, maibé fiu sira-ne’e kle’ur nian no fiu ne’e fiu internet ne’ebé aat ona.
Arguidu deklara katak kazu tara aan iha sela ne’e foin primeiravéz akontese ka José Bernardo mak dahuluk.
Hafoin rona tiha arguidu nia depoimentu, juíz prosesu José Escurião marka fali julgamentu ne’e ba loron 4 Marsu 2025 tuku 14:00 Otl, hodi kontinua halo inspesaun bá lokál akontesimentu liuliu fatin ne’ebé asegura José Bernardo.
Jornalista: Natalino Costa
Editór: Xisto Freitas da Piedade
