DILI, 28 Fevereiru 2025 (TATOLI)—Tribunál Judisiál Primeira Instánsia Dili (TJPID), sesta ne’e, liuhusi juiza singulár Francisca Cabral, deside aplika pena multa ba membru FALINTIL-Forsa Defeza Timor-Leste (F-FDTL) ho inisiál TOS ne’ebé envolve iha krime omesídiu neglijente ka soke mate ema iha área Hera, Postu Admnistrativu Kristu-Rei, munisípiu Dili, iha Fevereiru 2024.
“Tribunál aplika pena multa durante loron 180 nia laran arguidu tenke selu taxa diária ho valór sentavu 50 ba Tribunál,” juiza prosesu Francisca deklara iha sala julgamentu TJPID, Kaikoli.
Juiza Francisca iha nia desizaun mós fundamenta katak bandu arguidu TOS atu kondús motór durante fulan tolu.
Notísia relevante: Tribunál julga membru F-FDTL tanba envolve krime omisídiu neglijente
Juiza Francisca afirma, desizaun Tribunál nian ne’e sei submete mós ba Komandu FALINTIL-Forsa Defeza Timor-Leste, fatin ne’ebé arguidu TOS serbisu ba.
“Desizaun ida-ne’e Tribunál hanesan fó koñesimentu ba Komandu F-FDTL atu bá-oin Komandu bele fó hanoin ba TOS karik kondús motorizada iha dalan públiku tenke kuidadu ka atensaun no kondús tuir seguransa rodoviária,” nia konklui.
Jornalista: Natalino Costa
Editór: Xisto Freitas da Piedade
