DILI, 03 Marsu 2025 (TATOLI)-Komunidade Suku Bekora, Postu Administrativu Kristu-Rei, Munisípiu Dili, la satisfeitu ho markasaun daruak ne’ebé governu halo ba alargamentu estrada.
“Ohin hamutuk iha ne’e, komunidade afetadu Suku Bekora, Suku Kamea no Suku Ailok, deklara katak ami rejeita totál ba markasaun daruak, alargamentu estrada. Tanba ida ne’e afeta tebes ba komunidade ninia moris ne’ebé maioria depende ba atividade negósia husi rai ne’ebé hetan markasaun”, Portavós José Maria Ximenes, dehan iha konferénsia imprensa, Bekora, segunda ne’e.
“Ami ezize Governu atu rezolve uluk lai markasaun dahuluk alargamentu estrada hodi kumpre prosedementu tuir lei n.º 8/2017 ho ninia etapa sira.
Nia dehan razaun sira rejeita tanba antes ne’e iha loron 10 fulan-Janeiru liubá hamutuk ho SEATOU konkorda ba metru tolu, maibé depois ida-ne’e aumenta tan fali ba metru tolu.
“Ami rejeita, tanba konsidera alargamentu metru neen ne’e la planeadu no afeta mós ba Igreja Bekora”, afirma.
Nia informa, loja balun ne’ebé afetadu hetan ona lisensiamentu husi MOP iha Dezembru tinan kotuk. Maibé, Janeiru nia-laran ameasa ba eviksaun ho alargamentu metru neen ba kotuk, inklui edifisiu foun no murru postu administrativu Kristu Rei ne’ebé foin finaliza kontrusaun.
Nia dehan estrada parte Bekora sei iha dalan alternativa, kuandu iha engarrafamentu alternativa mak parte sul, transporte sira bele liuhusi Bekussi no Taibessi. Husi parte norte ka tasi feto iha alternative tolu, ida mak liuhusi Areia Branca bá Hera ka husi Hera mai Areia Branca; daruak husi mota Bekora nia sorin-sorin. Sorin ida mosu iha Bidau Massau, ida seluk mosu iha Auhun – Kola Vitoria, besik Ospitál Nasionál Guido Valadares (HNGV). Estrada liuhusi mota ninin ne’e, Maun Boot Xanana halo ona observasaun liu husi estasaun eletrisidade Kamea nian.
“Husi informasaun sira ne’ebé hato’o iha sensibilizasaun, ami komunidade konvensidu no konkorda, no kontribui ba alargamentu estrada referida”.
Sensibilizasaun ne’e, nia rekorda, Sekretariu Estadu, Germano Brites, fó hanoin ba komunidade afetadu ne’ebé seidauk iha dokumentu legál ruma, hakbesik-an ba Sede Suku atu hetan deklarasaun, nune’e fó indemnizasaun karik iha faktu. Sira ne’ebe iha kedas ona dokumentu komprovativu katak rai ka propriedade ne’e sira nian, sei lori ba aprezenta molok asina termu aseitasaun.
Nune’e SEATOU no ekipa fó prazu fulan-ida husi loron 10 fulan-Janeiru to’o loron 10 fulan-Fevereiru, iha ne’e sei halo enkontru ba da-ruak, inklui asina termu aseitasaun ne’ebe sei halo ho komunidade afetadu idaidak.
Maibé, realidade fulan ida nia-laran la akontese enkontru tuir kompromisu ne’ebé SEATOU promete. Aat-liu mak komunidade afetada voluntariamente ba MOP atu bele hetan informasaun kona-ba asina termu aseitasaun, infelizmente, MOP simu de’it dokumentu balun hanesan foto kopia kartaun eleitorál, konta bankaria no númeru kontaktu individu idaidak, maibé seidauk hetan termu aseitasaun.
Komunidade Bekora nia estatutu rai, nia dehan maioria rai privadu, ainhira Estadu hakarak utiliza rai privadu hodi interesse publiku nian tenke halo tuir prosesu legál bazeia ba lei númeru 8/2017 kona-ba espropriasaun ba utilidade públika ne’ebé regula kona-ba kondisaun no prosesa atu okupa propriedade privada ba utilidade públika.
Notísia relevante: Montana Diak hahú sobu uma ba alargamentu estrada Kuluhun-Bekora
Jornalista : Osória Marques
Editora : Rita Almeida
