DILI, 05 Marsu 2025 (TATOLI) – Kuarezma katak tempu loron 40 Santa Igreja konvida sarani-sira atu prepara-aan hodi selebra festa Páskua nian. Iha momentu ne’e, bolu mós sarani sira atu halo orasaun, ezmola no jejún.
Tanba ne’e, durante loron 40 bolu sarani idaidak filafali ba Na’i Maromak no la’o tuir dalan loos, tanba nu’udar ema moris iha mundu dalaruma okupadu no duni buat ne’ebé laiha valór, haluha hodi la fó importánsia ba buat ne’ebé esensiál iha moris ida-ne’e mak grasa Maromak nian.
Haktuir Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, iha nia omília iha misa kuarta-feira Sinza iha igreja Katedrál, ohin.
“Atu bá to’o tempu Kuarezma hahú ho sinzas [ahi-kadesan] ne’ebé ita kose iha rein-toos, fó hanoin fali mai ita kona-ba ita-nia moris loroloron ne’e buka saida? Loos duni, ita preokupa ita-nia moris, saúde, serbisu no seluk tan, maibé buat ne’ebé aas liu ida-ne’e mak oinsá ita moris tuir Maromak nia hakarak ne’ebé buat tolu importante tebes ita atu halo mak orasaun, ezmola no jejún”, Dom Virgílio dehan.
Nia esplika katak orasaun, ezmola no jejún ne’e kada tinan Santa Kreda konvida sarani sira atu idaidak iha korajen atu halo investimentu ba grasa Maromak nian ne’ebé bolu tezouru, tanba ida-ne’e rikusoin boot ida sarani nian ne’ebé sei la mohu.
“Kuarezma ne’e Santa Kreda bolu ita atu hametin ita-nia relasaun ho Maromak, ho maluk sira no ita-nia aan rasik. Objetivu husi orasaun mak durante tempu Kuarezma buka atu reza katak oinsá lori ita atu hanoin filafali kona-ba ita ne’e maihusi Maromak. Ezmola katak halo karidade ba ema seluk atu to’o bá Maromak. Ita labele taka matan ba ita-nia maun-alin sira ne’ebé presiza tulun no jejún ho abstinénsia katak bainhira ita iha duni korajen atu hatene ita-nia moris”, Arsebispu salienta.
Tuir nia, bainhira sarani sira hatene no halo orasaun, ezmola no jejún iha tempu Kuarezma mak ikus mai bolu dehan moris ne’e prezente ida husi Maromak.
Nia subliña katak iha tempu Kuarezma ne’e susar duni atu halo, maibé hanoin katak bainhira tau ahi-kadesan ba rein-toos ne’e atu hahú hanoin filafali frakeza no sala sira ne’ebé halo iha moris ida-ne’e, maibé la hotu iha ne’e, tanba Kuarezma ninia rohan mak Páskua, Sábadu Aleluia no Domingu Resurreisaun.
“Páskua katak maske ita iha frakeza hotu, maibé Maromak fó nafatin esperansa. Páskua kalan termina naroman kalan páskua nian, ba hirak ne’ebé fiar no hakaas-aan sei hetan nafatin esperansa, katak loron ida nia sei bele haksolok hamutuk ho Maromak”, konklui.
Jornalista: Arminda Fonseca
Editora: Maria Auxiliadora
