DILI, 07 marsu 2025 (TATOLI)- Banku Mundiál no International Finance Corporation (IFC) hamutuk ho parseiru sira komemora Loron Mundiál Feto liuhusi semináriu ne’ebé diskute kona-ba partisipasaun feto Timor-Leste nian iha negósiu.
Tuir Reprezentante Banku Mundiál iha Timor-Leste, Bernard Harborne, hateten semináriu ne’e aprezenta oradór na’in-hitu ne’ebé diferente hodi fahe esperiénsia no dezafiu feto nia partisipasaun sira iha negósiu no direitu.
“Ha’u espera katak liuhusi semináriu ne’e bele prodús diskusaun sira ne’ebé interesante no importante liu hodi selebra lideransa feto nian iha negósiu no direitu”, dehan Bernard Harborne iha abertura semináriu ne’e ho tema “Aselera Asaun” iha edifísiu Banku Mundiál Lesidere, sesta ne’e.
Iha fatin hanesan, Vise-Ministra Finansa, Felícia Carvalho, fó hanoin ba feto sira liuliu ba sira ne’ebé iha kareira ka foin hahú atubele servisu hamutuk la presiza haree ba seniór ka juniór iha ajénsia ida.
“Ema barak dehan ‘Feto Forte, Nasaun Forte’ maibé pensamentu ne’e mós tenke forte, Timor-Leste iha feto barak liu, maibé uitoan de’it mak iha kareira. Tanba razaun ida-ne’e feto sira tenke kuidadu liu iha hili serbisu no ambiente serbisu nian. Feto sira ne’ebé seniór iha ajénsia ida tenke prontu atu sai mentór ba sira ne’ebé foin aprende, ida ne’e aplika iha fatin hotu-hotu,” dehan Vise-Ministra Finansa ne’e.
Tuir nia, ema hotu tenke hametin komunikasaun iha nivel hotu-hotu hodi rona no fó fatin ba ema hotu nia opiniaun, ierarkia sira ne’ebé estabelese ona sai saudável liután.
Entretantu, Prezidente Asosiasaun Empezariál Feto Timor-Leste (AEMTL), Herguiluina Alves, rekoñese moris Timor-Leste nian. Klaru tebes katak iha sistema patriarkál ne’e dezafiu ida ba feto sira, tanba sira tenke hala’o papél barak iha família no iha sira-nia kareira.
“Dalaruma ida-ne’e susar tebes maibé ho jestaun tempu di’ak ha’u hanoin ida-ne’e bele halo. Ha’u nia dezafiu prinsipál maka jere tempu, tanba ha’u tenke asegura katak buat hotu di’ak antes sai husi uma”, Prezidente AEMTL hatete.
Reprezentante IFC, David Freedman, hateten rezultadu ida husi diskusaun ne’e mak oinsá atu labele para estuda, tenke iha prioridade rasik no klaru, maske okupadu iha kareira, labele haluha mantein saúde.
Oradór sira kona-ba tópiku Feto iha Direitu kompostu husi Francisca Cabral (Juíza iha Tribunál Dili), Maria Marília da Costa (Adjunta Provedora Direitu Umanu), Prezidente Grupu Feto Parlamentár Timor-Leste no mós Deputada, Aliança da Conceição Araújo no Ana Marçal (Ezekutivu Sistema Judisiál Programa Judisiál).
Oradór ba Feto iha Negósiu inklui Herguiluina Alves (Prezidente AEMTL Associação Empresarial das Mulheres de Timor-Leste), Claricia Lay (Diretora Jacinto Unipessoal Lda) no Domingas dos Santos (Credit Union Lanamona).
Notisia relevante: Loron mundiál feto, PM Xanana subliña proporsiona igualdade no empoderamentu
Jornalista: Osória Marques
Editór: Florencio Miranda Ximenes
