DIILI, 10 Marsu 2025 ( TATOLI)—Ministru Interiór, Francisco da Costa Guterres, hateten Australian Federal Police (AFP) entrega ona rezultadu teste bala ne’ebé ema deskoñesidu uza hodi tiru rezidénsia antigu Prezidente Repúblika, Francisco Guterres Lú Olo, iha Faról, Dili, iha inísiu Janeiru 2025.
Governante ne’e dehan hafoin Komandu Jerál PNTL simu tiha rezultadu teste ne’e, submete kedas relatóriu ba Ministru Interiór no enkamiña tutan ona bá Ministériu Públiku atu halo investigasaun.
“Ami simu ona relatóriu ne’e. Agora daudaun tama iha prosesu investigasaun,” Francisco Guterres hateten ba jornalista sira hafoin enkontru ho Komandante Jerál no Ofisiál Superiór PNTL ne’ebé hala’o iha edifísiu Komandu Jerál PNTL Kaikoli, segunda ne’e.
Nia hatutan, hanesan membru Governu, nia labele fó komentáriu kle’an ba prosesu ne’e katak sé-sé mak envolve iha akontesimentu ne’e tanba segredu justisa.
Notísia relevante: PNTL kontinua buka tuir deskoñesidu tiru rezidénsia Lú-Olo
“Tanba ne’e segredu justisa, ne’ebé ha’u labele ko’alia. Ha’u la’ós prokuradór no investigadór,” nia adianta.
Rekorda fali katak iha sesta (24 Janeiru 2025), Komandu Jerál PNTL entrega ofisialmente bala ne’ebé ema deskoñesidu tiru iha rezidénsia antigu Prezidente Republika ne’e ba AFP hodi halo teste iha laboratóriu iha Austrália.
Jornalista: Natalino Costa
Editór: Xisto Freitas da Piedade
