DILI, 10 Marsu (TATOLI)—Ministru Interiór, Francisco da Costa Guterres, hateten Ministériu Interiór (MI) sei foku uluk hodi hadi’a kondisaun infraestrutura iha fronteira molok halo konstrusaun ba Kuartél Jerál Polísia Nasionál, Komandu Munisipál, Eskuadra inklui konstrui kazerna ba polísia sira.
Nia haktuir katak bazeia ba nia vizita sira iha fronteira nota katak postu Unidade Patrullamentu Fronteira (UPF) barak mak kondisaun aat, tanba ne’e mak Ministériu Interiór foku uluk hodi hadi’a kondisaun sira-ne’e molok konsentra bá infraestrutura polisiál sira seluk.
“Kondisaun infraestrutura polisiál ne’ebé aat liu mak iha fronteira. Uma ida hamriik iha-ne’ebá nakfera hotu ona, hariis fatin laiha, bee laiha, koziña laiha. Ita-boot sira hatene kulxaun ho kama hela ruin de’it, esponza laiha hotu maibe ita-nia membru sira toba iha leten,” Francisco Guterres hateten ba TATOLI, iha Sentru Formasaun Polísia (CFP)-sigla portugés), Komoro, segunda ne’e.
Nia dehan, atu hadi’a kondisaun sira-ne’e mak tenke tau uluk osan para rezolve tiha postu polísia iha fronteira. Kuandu rezolvidu ona kondisaun iha fronteira mak sei tama ba sira seluk.
“Tanba ne’e, dezde tinan kotuk ita buka rezolve infraestrutura polísia iha fronteira,” nia adianta.
Notísia relevante: Konstrusaun postu UPF iha Citrana atinje ona 85%
Kona-ba infraestrutura polisiál hanesan edifísiu ba Komandu Jerál, Komandu Munisipál, Eskuadra no kazerna ba polísia, governante ne’e afirma katak ne’e sei konstrui iha tinan ne’e. “Tinan ne’e ita prioriza fali ona bá iha eskuadra, kuartél, munisipál no kazerna,” nia hatutan.
Francisco dehan MI sei loke konkursu ba konstrusaun Eskuadra Vera-Cruz, Na’in Feto, Eskuadra sira iha postu administrativu, Kuartél PNTL, Komandu Munisipál sira inklui kazerna.
Kona-ba komunidade afetadu ba infraestrutura polisiál, Francisco Guterres, tenik komunidade ne’ebé afetadu ba iha infraestrutura polísia, Governu sei prepara osan hodi fó kompensasaun.
Jornalista: Natalino Costa
Editór: Xisto Freitas da Piedade
