OEKUSI, 14 Fevereiru 2025 (TATOLI)—Komandante Unidade Patrollamentu Fronteira (UPF), Superintendente Polísia, Euclides Belo, sesta ne’e, observa projetu reabilitasaun postu Unidade Patrollamentu Fronteira (UPF) ne’ebé lokalizada iha Citrana, suku Bene-Ufe, sub-rejiaun Nítibe, Rejiaun Administrativa Espesiál Oekusi Ambenu (RAEOA), ne’ebé daudaun ne’e atinje ona 85%.
“Postu UPF ne’ebé ohin mai observa ne’e, husi postu 41 ne’ebé mak UPF iha liuliu iha liña fronteira, iha-ne’ebé balun halo reabilitasaun no balun seluk halo melloramentu. Ne’ebé, ohin ita haree kualidade di’ak no besik ona atu finalizada,” Euclides Belo dehan iha postu UPF Citrana.
Tanba ne’e, nu’udár komandante unidade UPF, orgullu ba kompañia konstrutora no Ministériu Interíor (MI), tanba obra ne’e bele konstruida nune’e membru UPF sira bele okupa ho dignu iha liña fronteira.
“Ami sujere nafatin liuhusi komandu no ministériu, atu kontinua tau-matan ba infraestrutura liuliu estrada, atu fasilita mobilizasaun seguransa sira mai postu, tanba ohin ita observa dalan husi Oekusi mai to’o Citrana barak mak kotu, no afeta liubá komunidade no transporte sira atu transporta sasán husi baze bá vila,” nia rekomenda.
Teodoro Coa, nu’udár tékniku iha projetu reabilitasaun postu UPF Citrana, informa, serbisu fíziku kuaze konkluidu, hela de’it odamatan no janela inklui halo pintura.
“Serbisu fiziku kuaze ramata ona. Agora hela de’it mak odamatan no janela seidauk montada ho pinta. Bele dehan atinje ona 85%. Ne’ebé, ami sei esforsa kaundu eletrisidade la falla entaun fevereiru ne’e ami bele finalize. Ida-ne’e ami garante tanba materiál sira kompletu ona. Durante ne’e ami falla iha ahi tanba udan prejudika ahi mate entaun ami labele halo serbisu ho lais,” nia haktuir.
Notísia relevante:MI hapara projetu Postu UPF tolu iha Oé-Cusse
Projetu reabilitasaun ne’e ezekuta husi kompañia Monte Cassa Sul Contruction Unipessoal, Lda ho valór kontratu hamutuk $51,305.10, ho durasaun serbisu fulan rua, hahú iha loron 29 Novembru 2024 no finaliza iha loron 29 Janeiru 2025.
Jornalista: Abílio Elo Nini
Editór: Xisto Freitas da Piedade
