DILI, 11 Marsu 2025 (TATOLI)—Prezidente Repúblika (PR), José Ramos Horta, énfaze katak nesesariamente fó prioridade ba infraestrutura Unidade Patrullamentu Fronteira (UPF) nune’e bele asegura liña fronteira ho di’ak.
“Infraestrutura (edifísiu) liuliu iha fronteira ne’e importante. Fronteira hanesan ita-nia imajen iha mundu, tan ne’e polísia fronteira tenke top quality, top salary, top insentive,” nia dehan ba jornalista sira hafoin partisipa semináriu nasionál iha ámbitu komemorasaun Polísia Nasionál Timor-Leste (PNTL) ba dala 25 ne’ebé ho tema “Hamutuk Ita Hametin Konfiansa ba Polísia Nasionál Timor-Leste”, iha Sentru Formasaun Polísia (CFP-sigla portugés), Komoro, tersa ne’e.
Horta dehan, iha nasaun membru The Association of Southeast Asian Nations (ASEAN), forsa no polísia sira mesak profisionál, maibé ida ka rua mak sei araska hanesan Myanmar.
Notísia relevante:MI foku uluk infraestrutura polisiál iha fronteira
“Ha’u kompara Timor-Leste ho Myanmar ne’e, Timor-Leste ne’e iha Lalehan, Myanmar iha Infernu,” nia subliña.
Laureadu Nobel da Paz iha Ozlo, Noruega, 10 Dezembru 1996, sujere katak tenke aumenta partisipasaun feto iha instituisaun polísia.
Iha biban ne’e, Xefe Estadu parabeniza antesipadamente aniversária PNTL ba dala 25 (27 Marsu 2000-27 Marsu 2025) no orgullu ho dezenvolvimentu Polísia Nasionál Timor-Leste (PNTL) iha ninia ezisténsia.
Horta haktuir, durante ne’e PNTL adapta aan ona ba modernizasaun maibé husu ba Governu kontinua halo reforma nune’e hadi’a instituisaun ho di’ak liután.
Tuir nia katak Governu no Komandu Jerál PNTL presiza reforma ona membru sira-ne’ebé idade atinje ona 70 tanba idade 70 la merese ona hamriik iha estrada, no solisita tau atensaun mós ba kondisaun membru polísia, kontinua fó formasaun no promosaun diviza.
Jornalista: Natalino Costa
Editór: Xisto Freitas da Piedade
