DILI, 11 Marsu (TATOLI)—Sekretáriu Estadu Komunikasaun Sosiál, Expedito Loro Dias Ximenes, selebra akordu servisu ho mídia plataforma online hodi divulga programa Governu nian hanesan Governu Rona, Haree Rasik no Advertoriál.
Mídia plataforma sira-ne’ebé envolve iha akordu kooperasaun mak hanesan TATOLI-Agência Noticiosa de Timor-Leste, I.P, Grupo Media Nacional, Smnews, Media Mudansa, TVE, VIP, Lafaek News, Gardamor TV, SapNews, Hatutan Com. Mídia Orluli no Media One Timor.
Orsamentu ne’ebé Governu liuhusi Sekretaria Estadu Komunikasaun Sosiál (SEKOMS) prevee hodi finánsia ba programa tolu hanesan Governu Rona, Haree Rasik no Advertoriál ba tinan ne’e hamutuk $60.000.
Notísia relevante: SEKOMS selebra kontratu ho mídia lima ba distribuisaun jornál
Sekretáriu Estadu Komunikasaun Sosiál, Expedito Loro Dias Ximenes, hateten objetivu husi akordu ne’e atu habelar informasaun kona-ba servisu IX Governu liuhusi plataforma mídia ne’ebé eziste.
“La signifika atu halo intervensaun ba servisu redasaun mídia, maibé hanesan kria parseria ho mídia sira atubele publika atividade sira-ne’ebé Governu halo, nune’e públiku bele akompaña progresu dezenvolvimentu iha rai-laran,” Expedito dehan iha ámbitu selebra akordu ho mídia plataforma online ne’ebé hala’o iha sala Prezidénsia Konsellu Ministru, Palácio do Governo, tersa ne’e.
Jornalista: Natalino Costa
Editór: Xisto Freitas da Piedade
