DILI, 19 Marsu 2025 (TATOLI) – Ministru Prezidénsia Konsellu Ministru, Agio Pereira, aprezenta projetu dekretu-lei kona-ba Rejime tutela administrativa ba pesoa koletiva públika ne’ebé integra iha Administrasaun Indireta Estadu no hetan ona aprovasaun.
Tuir nota husi Governu, diploma ida-ne’e atu responde ba nesesidade hodi uniformiza ezersísiu podér tutela no superintendénsia ba institutu públiku sira, nune’e bele garante jestaun ida ne’ebé efisiente no koordenada liu.
“Sein prejuizu ba espesifisidade entidade idaidak nian, rejime ida-ne’e estabelese kuadru komún ida ba supervizaun governamentál, hodi asegura koerénsia ne’ebé boot-liu iha atuasaun institutu públiku sira”, dokumentu ne’e dehan.
Diploma ne’e define kompeténsia husi membru Governu ne’ebé tutela, nune’e mós autorizasaun konjunta lubuk ida ne’ebé, tanba ninia impaktu iha despeza públika, tenke hetan aprovasaun iha koordenasaun ho Ministériu Finansa.
“Aktu sira ne’ebé relasiona ho organizasaun Administrasaun Públika no partisipasaun iha entidade privada oras ne’e presiza aprovasaun hosi Konsellu Ministru, no aktu sira ne’ebé laiha autorizasaun ne’e konsidera nulu”.
Nune’e mós prevee tutela substitutiva hodi permite governante atu halo intervensaun iha kazu inérsia grave, hodi garante kumprimentu ba obrigasaun legál sira.
“Violasaun ba norma bele hamosu responsabilidade sivíl, kriminál, dixiplinár no finanseira. Atu adapta ba regra foun, institutu públiku sira sei iha períodu tranzisaun ida hodi halo revizaun ba sira-nia estatutu no lejizlasaun interna”, dehan.
Jornalista: Arminda Fonseca
Editora: Maria Auxiliadora
