Autoridade RAEOA no Lia-na’in realiza serimónia kulturál hodi reabilita estrada iha Cabana

OEKUSI, 19 Marsu 2025 (TATOLI) – Autoridade Rejiaun Administrativu Espesiál Oekusi no Ambeno (RAEOA) liuhusi Diresaun Rejionál Infraestrutura (DRI) hamutuk lia-na’in no komunidade iha aldeia Cabana, suku Suni-Ufe realiza serimónia rituál molok halo reabilitasaun ba estrada rurál Cabana antigu ho distánsia kilometru 13.

Diretór Diresaun Rejionál Infraestrutura, Remigío Nuno Sila, informa katak seremónia rituál ne’e atu husu lisensano hetan matak malirin ba rai-na’in, nune’e kompaña bele hahú ona servisu hamoos no aterru estrada rurál.

Notísia relevante:Abitante Taiboko koopera ho empreza halo reabilitasaun estrada iha Makelab-Nemun

Projetu referidu sei ezekuta husi kompañia One Monte Cassa Sul Unipesoál Lda ho distánsia kilometru 13.

Projetu reabilitasaun ne’e kategória emerjénsia ho nia verba mai husi proposta kompañia sira no daudaun ne’e sei iha faze verifikasaun husi Diresaun Rejionál Infraestrutura (DRI) no Ajénsia Dezenvolvimentu Nasionál (ADN) mak  hafoin hetan kontratu  loloos kona-ba orsamentu hira mak sei ezekuta iha projetu ne’e.

“Proposta submete mai ho kustu rihun $400-resin, maibé la inklui ho ponte ki’ik sira, entaun ita rekomenda fali ba kompañia atu envolve mós ponte no nahe simentu ba subida sira, ne’ebé ohin ita hahú ho rituál ne’e atu husu matak malirin, nune’e projetu ne’e bele la’o ho susesu to’o remata,” Dehan nian hafoin hala’o seremónia rituál iha uma lulik, Maonhaef aldeia Cabana, kuarta ne’e.

Iha fatin hanesan, Xefe suku Suni-Ufe, Crisanto Tamele, rekomenda atu envolve komunidade sira liuliu juventude atu sai mós traballdór iha projetu reabilitasaun estrada rurál ne’e.

“Estrada husi Oenunu liga ba Cabana Antigu ho komunidade uma-kain 246 mak asesu ho totál populsaun 500-resin, ne’ebé husu atu envolve komunidade iha ne’e atu sai traballadór,” nia sujere.

Kona-ba seremónia, rituál, nia dehan, antes ne’e komunika ona ho lia-na’in sira, tanba obra ne’e la’o sei hakat liuhusi fatin lulik balun entaun presiza halo rituál atu husu bei-ala no rai na’in atu fó susesu ba projetu ne’e.

“Estrada husi Oenunu ba Cabana antiga, kondisaun estrada aat totál, nune’e prejudika ita-nia komunidade sira atu lori sira-nia produtu ba merkadu. Nune’e ami agradese ohin ita hahú halo ona rituál, espera ita sei hetan matak malirin to’o finaliza projetu ne’e,” nia informa.

Notísia relevante:KAFI Oekusi aprova projetu emerjénsia 26 ho kustu millaun $36-resin

Jornalista: Abílio Elo Nini

Editór: Florencio Miranda Ximenes