OEKUSI, 18 Marsu 2025 (TATOLI) – Komunidade sira iha suku Taiboko promete ba Autoridade Rejiaun Administrativa Espesiál Oekusi Ambeno (RAEOA), hodi koopera ho kompañia konstrutora halo reabilitasaun ba estrada kilometru 11, hahú husi merkadu tradisionál aldeia Maquelab to’o merkadau tradisionál Neofnua aldeia Nemun.
Ekipa konjunta husi Diresaun Rejionál Infraestrutura, servisu agrikultura no terra propriedade inklui Asesór Prezidente Autoridade ba Asuntu sosiál, tersa ne’e, hala’o dialogu aberta ho komunidade Nemun suku Taiboko, kona-ba reabilitasaun estrada rurál husu merkadu tradisionál aldeia Makelab to’o merkadu tradisionál Neofnua aldeia Nemun.
Notísia relevante:Sidadaun afetadu projetu estrada Taiboko-Lifau kontente Autoridade oferese uma
“Ami autoridade lokál suku Taiboko liuliu aldeia Maquelab mai to’o aldeia Nemun kontente, apoia tebes atu hadi’a ami-nia estrada, tanba estrada ne’e loke iha tempu portugés to’o agora mak foin reabilita, ne’ebé ami laiha impedimentu,” Xefe suku Taiboko, Mateus Naz, informa, iha ámbitu dialogu hala’o iha merkadu tradisionál Neofnua, tersa ne’e.
Autoridade komunitáriu ne’e, propoin karik reabilita estrada ne’e konsidera komunidade sira-nia rai no plantasaun, maibé ne’e la’o ejize maibé konsidera tau ba hanesan dadús karik iha futuru osan ruma iha ka ai-han ruma bele rekupensa.
“Ha’u orgullu tanba diálogu ne’e importante, antes reabilita presiza mai ko’alia direita ho komunidade, atu kontribui oinsam, no ami mós sei apoia ekipa tékniku atu rejista saida mak hetan estragu, maibé Taiboko promete sei laiha impedimentu ba dezenvolvimentu, tanba dalan ne’e la’os ha’u mesak mak uza maibé ba ema barak nian, ne’ebé laiha ema ida atu impede, ami só sujere kooperasaun karik afeta buat ruma, presiza hasai foto no rejista sai hanesan dadus,” nia rekomenda.
Notísia relevante:Kanalizasaun bee-moos iha Taiboko benefísia abitante 2.043
Iha fatin hanesan, lia-na’in aldeia Nemun, Jacinto Taninas, rekomenda ba Autoridade RAEOA no kompaña konstrutora, molok halo reabilitasaun konsidera fatin kulturál sira atu husu matak malirin.
“Dalan husi Neofnua tuun ba Makelab iha fatin rua ka tolu presiza halo rituál uluk tanba fatin ne’e lulik dezde uluk to’o agora, kada tinan ami selebra oho fahi lima, tanba ne’e espera autoridade ho kompañia presiza konsidera fatin kultura sira, atu nune’e ita hala’o projetu ne’e la’o ambiénte hakmatek no séguru,” nia informa.
Nia informa, daudaun ne’e tempu udan, batar, haree no aifarina fehuk barak sei moris hela iha toos laran, karik kompaña ateru hodi estraga, presiza rejista metru hirak mak estraga, tanba aifarina nia funsaun iha tolu, nia tahan ho isin bele haan no bele faan ba merkadu nia kain sai fali fini.
“Kuandu estraga de’it senti ladun di’ak tanba komunidade sira kolen ona halo servisu toos, ami la’os ejize maibé konsidera rejista de’it sai dadus ba futuru bele konsidera, kona-ba konstrusaun ne’e kontinua la’o tanba ne’e servisu Governu nian atu dezenvolve ita-nia rai, laiha ema atu impede,” nia dehan.
Hatan ba kestaun ne’e, Diretór Diresaun Rejionál Infraestrutura, Remigío Nuno Sila, informa diálogu ne’e importante atu rekolla ideia no informasaun husi komunidade sira, antes projetu ne’e hahú, tanba ne’e, ohin ekipa konjunta mai direita hanesan diretór sira ho tékniku husi Dirresaun Agrikultura, Terra Propriedade parte Servisu Agua Saneamentu (SAS).
“Rekomendasaun ohin ita konsidera ona no husi Obra Públika, espera bele fó kontribuisaun ba loke estrada, tanba sei afeta ba ai-oan sira no rai, entaun presiza koopera nune’e kompañia bele ezekuta servisu tuir medida luan ne’ebé dezeña ona, exemplu metru-8 tenki kumpre,” nia dehan.
Nia informa projetu ne’e aprova husi Konsellu Administrasaun Fundu Infraestrutura (KAFI) datoluk hodi reabilitasaun husi merkadu tradisionál aldeia Makelab to’o merkadu tradisionál Neofnua aldeia Nemun ho distánsia kilometru 11.
Entretantu, projetu reabilitasaun ne’e ezekuta kompañia rua, Fitun Sanane Unipesoál Lda ho kompañia Lober Unipesoál Lda kada. To’o seidauk selebra kontratu ho Autoridade RAEOA tanba kompañia sei kumpre hela ordén servisu hodi hein desizaun finál husi Ajénsia Dezenvolvimentu Nasionál (ADN).
Notísia relevante:Autoridade RAEOA hatuur fatuk dahuluk reabilita estrada rejionál Nunuheno ba Taiboko
Jornalista: Abílio Elo Nini
Editór: Florencio Miranda Ximenes
