Sidadaun afetadu projetu estrada Taiboko-Lifau kontente Autoridade oferese uma
OÉ-CUSSE 07 outubru 2023 (TATOLI)—Abitante sira iha suku Taiboko no Lifau iha Rejiaun Administrativa Espesiál Oé-Cusse Ambeno (RAEOA) kontente tanba Governu liuhosi Autoridade halo kompensasaun ba sira-nia uma ne’ebé afetadu projetu estrada hosi Noefefan bá sub-rejiaun Nítibe, ho uma fatuk.
Abitante afetadu suku Taiboko, Sebastião Iku, expresa nia sentimentu ksolok ne’e ba Prezidente Autoridade RAEOA, Arsénio Paixão Bano, bainhira hala’o fizkalizasaun ba uma afetadu projetu iha suku Taiboko no suku Lifau, sábadu ne’e.
“Ha’u hanesan abitante afetadu, Governu ajuda ami tanba ami-nia uma hetan afeta hosi projetu estrada ne’e, ha’u katuas ona, se Governu la hanoin ha’u, la hatene ha’u atu bá hela iha ne’ebé, maibé agradese tanba uluk ha’u-nia uma tali, maibé agora halo fali ho uma fatuk, no hela gratis hein simu xave de’it,” nia agradese.
Iha fatin ketak, Abitante afetadu hosi suku Lifau, Joana Taek, sente kontente no agradese ba Autoridade RAEOA tanba bele kria ona kondisaun ba abitante lokál.
“Ha’u kontente loos, ha’u-nia uma ne’e di’ak ona, ami kontente tanba dalan mós di’ak no uma mós di’ak ona, uluk uma tali, agora ne’e uma fatuk ona, ha’u-nia laen ho ami nia-oan kontente loos tanba uma di’ak ona, ha’u agradese ba Governu tanba tau matan mai ami,” nia expresa sentimentu.
Notísia relevante : RAEOA lansa pagamentu ba plantasaun ne’ebé afeta projetu ZEESM
Prezidente Autoridade RAEOA, Arsénio Paixão Bano, hateten, Governu liuhosi Autoridade RAEOA kumpre ona nia promesa hodi kria polítika kompensasaun ba komunidade ne’ebé hetan afetadu projetu.
“Ohin iha ita mai haree uma troka uma, ita haree katak, RAEOA troka uma 120, ita halo daudaun ona uma 36, ita tempu badak ita halo tan uma 86, uma boot troka uma boot, uma ki’ik troka ho uma ki’ik no uma naton tipu C nian troka ho uma naton,” Arsénio dehan.
Notísia relevante : Autoridade RAEOA harii uma 36 troka uma tali
Projetu abitasaun sosiál hamutuk 36 ne’e iha modelu tipu tolu, tipu A uma ho medida 13×10, ezekuta hosi empreza Rumbia Luliheni Unip.Lda, ho valór kontratu $102.281,92, ho durasaun implementa serbisu fulan-haat.
Uma ho tipu C nia medida 7×6, ezekuta hosi empreza Nunmabun Unip Lda, ho valór kontratu $369.681,96 no tipu C seluk ezekuta hosi empreza Sikoneroc Unip.Lda, ho valór orsamentu $228.928.99, durasaun implementa serbisu fulan haat.
Kona-ba tipu B nia médida 9×12, maibé daudaun ne’e sei iha prosesu aprovizionamentu.
Jornalista : Abílio Elo Nini
Editora : Julia Chatarina
