DILI, 19 Marsu 2025 (TATOLI)—Deputadu Bankada opozisaun husi Kmanek Haburas Unidade Nasionál Timoroan (KHUNTO), Luís Roberto, rekomenda Governu liuhusi Ministériu Interiór (MI) no Komandu Jerál Polísia Nasionál Timor-Leste (PNTL) atu aumenta postu Unidade Polísia Fronteira (UPF) iha liña fronteira.
“Aumenta postu no númeru UPF hodi kontrola di’ak liután iha liña fronteira, tanba tuir fiskalizasaun iha nesidade duni,” Deputadu hato’o iha resintu Parlamentu Nasionál, kuarta ne’e.
Notísia relevante : Komandante Euclides observa projetu reablitasaun postu UPF 41
Iha fatin hanesan, Deputadu Bankada Governu husi Kongresu Nasionál Rekonstrusaun Timorense (CNRT), Saul Salvador, husu atu aumenta postu UPF iha liña fronteira, liuliu iha Fatumea hodi kontrola movimentu ilegál sira.
“Iha 15 Marsu akontesimentu ida iha aldeia Mota Ulun, suku Fatumea, postu Fatumea, iha agrikultór ida hetan problema ninia karau 18 lakon, tanba ne’e komunidade parte ne’ebá preokupa tebes ho parte seguransa nian hodi kontrola fronteira, iha ona postu UFP rua iha Aikaka no Belulik Leten maibé iha Foho Rameia ne’e fatin ida dalan boot ba atividade ilegál, entaun tuir komunidade bele iha risku, ema deskoñesidu bele foti subar komunidade sira-nia animál. Tanba ne’e sira hakarak tebes atu estabelese postu UPF,” nia katak.
Vise-Ministru ba asuntu Parlamentár, Adérito Hugo da Costa, rejista preokupasaun ne’e no sei hato’o ba ministériu tutela hodi tau atensaun.
Postu UPF estabelesidu iha fronteira daudaun ne’e hamutuk 47, halo hela reabilitasaun inklui instala ona ekipamentu ba postu 41, enkuantu neen seluk iha prosesu verifikasaun husi Ajénsia Dezenvolvimentu Nasionál (ADN).
UPF eziste husi IV Governu Konstitusionál nia dekretu-Lei nú. 9/2009, loron 18 Fevereiru, kona-ba lei orgánika Polísia Nasíonál Timor-Leste, artigu 33 kona-ba funsaun husi UPF hala’o patrullamentu no vijilánsia iha fronteira territoriál sira, no iha koordenasaun no kooperasaun ho parte interesada sira seluk, espesialmente ho FALINTIL-Forsa Defeza Timor-Leste (F-FDTL) hodi kontrola movimentu ema no sasán sira iha fronteira territoriál, ho koordenasaun no kooperasaun ho Servisu Migrasaun no Alfándega.
Koopera mós ho autoridade administrativa relevante sira seluk tuir lejizlasaun fiskál, aduaneira no sanitaria, aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk, fó seguransa iha aeroportu hodi hala’o patrulla haleu pista, terminál no aeroportu ho kooperasaun hamutuk ho parte interesada sira seluk no kna’ar lejítimu sira seluk, tuir nia misaun.
Jornalista : Nelson de Sousa
Editora : Julia Chatarina
