DILI, 22 Marsu 2025 (TATOLI)- Sidadaun Filipina, Arnolfo Teves Jr , hato’o apresiasaun ba sistema judisiáriu Timor liuliu desizaun Supremu Tribunál Justisa ho bazea ba Konstitusaun Republika Demokratika Timor-Leste (KRDTL), hodi la halo estradisaun ba Nia parte atu fila ba nasaun orijen Filipina.
“Ha’u agradese primeiru ba Maromak no Ha’u apresia ba Sistema Judisiál ninian tanba Sistema Judisiáriu Timor-Leste di’ak loos,” Arnolfo Teves hateten ba jornalista sira iha Nia rezidensia Metiaut, Sábadu ne’e.
Notisia relevante:Supremu Tribunál Justisa deside la halo estradisaun ba Arnolfo Teves
Biban ne’e, nia lamenta ba posizaun Ministru Justisa Filipina nia ne’ebé lamenta ho sistema Judisiáriu Timor-Leste nia tanba deside la halo estradisaun.
“Ha’u atu dehan katak buat ne’ebé Ministru Justisa Filipina ko’alia ne’e la loos, la’ós hanesan ne’e, maibe realidade sistema Judisiáriu Timor-Leste di’ak liu”, nia afirma.
Iha fatin hanesan, Advogado privadu Arnolfo Teves nian, José Ximenes, hateten dala ida tan lori Arnolfo Teves Jr agradese ba povu timor tomak no apresia sistema Judisiáriu Timor-Leste nian funsionamentu.
Jose hateten, relasiona ho desizaun Supremu Tribunál Justisa ne’ebé deside la halo estradisaun ba nia kliente Arnolfo Teves Jr ba fali nia nasaun orijen Filipina ne’e tanba Tribunál deside tuir fundamentasaun rua hanesan Tribunál haree katak faktu no provas katak iha Filipina iha duni pena de morte no prizaun perpetua.
Tuir nia, razaun segundu ne’ebe Supremu Tribunál Justisa fundamenta iha nia desizaun foin daudaun ne’e mak Tribunál haree katak faktu provadu katak kuandu Arnolfo Teves Jr estradita bá nasaun orijen sei hetan tratamentu kruel no desumanu.
” Husi pontu de vista Konstituisaun Republika Demokratika Timor-Leste artigu 35 numeru tolu proividu ida ne’e. Husi fundamentu rua ida ne’e mak sai baze ba Supremu Tribunál Justisa iha materia ida hodi rekuza ka rejeita estradita ami nia kliente fila fali bá Filipina”,nia esplika.
Atu halo estradisaun ba ema ida bá nia nasaun orijen ne’e tenke prienxe ba materia estradisaun rua hanesan lei numeru 15/2011 kona-na lei kooperasaun judisiál internasional no materia penál no haree mos husi lei substansiál nasaun orijen liuliu ema ne’ebe atu halo estradisaun.
“Maibe iha kazu ami nia kliente nia ne’e lei substansiál sira admite atu aplika pena do morte no prizaun perpetua ba Arnolfo Teves no iha provas hatudu katak iha tratamentu kruel no desumanu ba ami nia kliente”, nia afirma.
Nune’e, Advogadu Privadu ne’e konsidera desizaun husi Supremu Tribunál Justisa fjustu no adekuadu no desizaun ne’e tránzitu ein julgadu ona.
“Desizaun husi Supremu Tribunál Justisa ne’e as liu tanba Tribunál as liu mak foti, Nune’e Filipina la konkorda ho desizaun ne’e ka la’e. Ne’e kestaun lei nasaun idaidak nian, espera Filipina tenke kumpre ba lei Timor nian tanba Timor-Leste nu’udar Estadu Direitu Demokrátiku.
Aleinde ne’e, nia agradese ba jornalista sira ne’ebe durante ne’e sempre halo kobertura ba prosesu Arnolfo Teves nian to’o foin dadaun hetan desizaun finál husi Supremu Tribunál Justisa.
Jornalista: Natalino Costa
Editór: Florencio Miranda Ximenes
