DILI, 21 Marsu 2025 (TATOLI)—Prezidente Tribunál Rekursu, Deolindo dos Santos konfirmadu katak Supremu Tribunál Justisa (STJ) iha kinta (20/3) ne’e, hasai ona desizaun katak la halo estradisaun ba Arnolfo Teves Jr hodi haruka filafali bá nia nasaun orijen Filipina, maski nune’e, hanesan líder másimu Tribunál, nia lakohi fó komentáriu kle’an ba kestaun ne’e.
“Ha’u hanoin imi hatene ona. Ha’u labele halo tan komentáriu, maibé akordaun ne’e loos,” Deolindo ba Tatoli iha nia kna’ar fatin, Kaikoli, sesta ne’e.
Enkuantu, Ministru Justisa, Sergio Hornai hateten Governu respeita desizaun Supremu Tribunál Justisa ne’ebé la halo estradisaun Arnolfo Teves Junior.
“Ita-boot sira hatene katak Repúblika Demokrátika Timor-Leste ne’e órgaun soberánia unitária independente ida, atubele garante ninia interese lejítimu bá iha sidadaun sira tantu sidadaun orijinária no mós sira-ne’ebé mai rezide iha territóriu Timor-Leste,” nia afirma.
Notísia relevante: Supremu Tribunál Justisa deside la halo estradisaun ba Arnolfo Teves
Governante ne’e hatutan, respeita bá iha Kontituisaun RDTL tanba Timor-Leste hanesan Estadu, tenke respeitu ba lei sira.
Nia esplika katak presiza iha protesaun ba sidadaun rezidente tanba Timor-Leste mós hola parte iha membru-Estadu Nasaun Unida (ONU) nian, tenke haree mós konvesaun internasionál tanba Estadu Timor-Leste nu’udár Estadu direitu ne’ebé respeita bá iha direitu umanu, tan ne’e laiha razaun atubele hasai ema nian vida, tanba Timor-Leste la rekoñese kona-ba pena morte.
“Ita tenke respeita bá iha desizaun Tribunál ninian tanba iha artigu 118 husi ita-nia Konstituisaun RDTL, Tribunál nia desizaun ne’e prevalese bá iha órgaun Estadu nian tomak,” nia subliña.
Rekorda fali katak iha loron kinta (20/03), Supremu Tribunál Justisa deside la halo estradisaun ba Arnolfo Teves Jr atu fila bá nia nasaun orijen Filipina.
Jornalista: Natalino Costa
Editór: Xisto Freitas da Piedade
