DILI, 21 Marsu 2025 (TATOLI)—Tribunál Judisiál Primeira Instánsia Dili (TJPID), sesta ne’e, kontinua halo audiénsia julgamentu ba kazu José Bernardo nia mate iha 2022.
Iha audiénsia julgamentu, Tribunál ajendadu bá halo inspesaun iha Sela Komandu Polísia Nasionál Timor-Leste Munisípiu Dili, iha-ne’ebé nu’udár fatin José Bernardo hakotu nia vida ho suspeitadu tara aan iha 2022.
Objetivu husi inspesaun ba sela Komandu Polísia Dili ne’e, Tribunál Koletivu hamutuk ho Ministériu Públiku no mandatáriu arguidu sira inklui asistidu vítima José Bernardo nian, hakarak atu hatene lala’ok matebian (José Bernardo) tama sela to’o-ikus hakotu nia vida ne’e oinsá.
Iha prosesu inspesaun, arguidu TV esplika ba Tribunál Koletivu katak momentu ne’e investigadór arguidu AA no arguidu TP mak entrega duni José Bernardo bá nia. Molok sira atu entrega, hakerek tiha livru identifikasaun 12, asina kedas husi arguidu AA nune’e entrega José Bernardo bá nia.
Arguidu TV esplika katak momentu arguidu na’in- rua entrega José Bernardo bá nia, ne’e hetan akompañamentu husi José Bernardo nia inan mós.
Notísia relevante: Arguidu Tomás Tavares deklara José Bernardo mak tara aan
Bainhira entrega tiha José Bernardo, arguidu TV lori kedas José Bernardo bá sela detensaun doze oras de tempo. Sala referida nu’udár aredór ki’ik ne’ebé besik sala detensaun ba oras 72 nian. Iha sala detensaun oras 12 ne’e, matebian José Bele halo nia movimentu livremente tanba espasu luan.
Nune’e, arguidu TV deklara ba juíz José Escurial katak momentu nia haree buat hotu la’o di’ak, matebian laiha buat ruma ho nia entaun arguidu TV sai bá fuma sigaru iha li’ur, maibé kuandu tama hikas mai sela laran, matebian José Bernardo tara aan ona.
“Nia (José Bernardo) tara aan ho fiu metan iha nia kakorok depois ain kona hela rai. Fiu uluk kedas iha-ne’e, fiu ba internet nian. Uluk iha-ne’e kle’ur más foin daudaun mak sira foti sai tiha husi ne’e. Uluk fiu ne’e tabele husi leten mai iha-ne’e,” esplika arguidu TV ba juíz José Escurial durante halo inspesaun ba sela Komandu PNTL, Kaikoli, Dili.
Enkuantu, iha inspesaun ba lokál krime ne’e, inspesiona direta husi Juíz Koletivu kompostu husi José Escurial, Francisca Cabral no Afonso Carmona, Ministériu Públiku reprezenta husi Prokuradór Adérito Tilman no arguidu sira hetan asistidu husi Defensór Estaqui Guterres, Juvinal Yenes Freitas no Maris, matebian José Bernardo hetan asistidu husi defensora Adelina.
Hafoin Tribunál Koletivu halo tiha inspesaun bá sela Komandu PNTL Munisípiu Dili iha Kaikoli, Tribunál prosede julgamentu iha Tribunál Judisiál Primeira Instánsia Dili hodi kontinua rona depoimentu sasin RS nu’udár inan husi José matebian José Bernardo.
Iha sala julgamentu, RS deklara ba Tribunál katak polísia sira bá foti matebian José Bernardo iha loron 2 Setembru 2022 tuku 10:00. Polísia na’in-haat mak bá foti inklui arguidu AAG.
Sasin haktuir katak momentu polísia sira bá foti José Bernardo iha uma Audian, José Bernardo koopera, maibé momentu ne’ebá polísia la aprezenta karta koñesimentu katak motivu saida mak foti José Bernardo.
Sasin deklara, maski nune’e, sasin nafatin koopera hodi entrega nia oan José Bernardo ba polísia.
Sasin dehan, nia hatene José Bernardo iha problema maibé problema saida nia lahatene kle’an, nune’e iha tuku 12:00 Otl, polísia lori José Bernardo bá Eskuadra Vera-Krúz hodi halo investigasaun.
Sasin hatutan, momentu ne’e, nia akompaña nia oan José Bernardo sa’e karreta polísia hodi submete bá investigasaun Eskuadra Vera-Krúz no iha dalan bá Eskuadra Vera-Krúz, nia husu polísia tanbasá foti nia oan, maibé polísia la esplika klara nia motivu.
Sasin deklara katak momentu polísia investiga nia oan, sasin akompaña nia oan iha sala li’ur investigasaun nian. Sasin hateten, polísia konklui investigasau ba José Bernardo iha tuku 12:00 Otl.
Sasin salienta, hafoin halo tiha identifikasaun ba José Bernardo, polísia sira lori José Bernardo husi Eskuadra Vera-Krúz ba detein iha sela detensaun oras 12 nia laran iha Komandu PNTL Munisípiu Dili maibé tanba oras han meudia sasin fila bá uma lori hahán mai fó José Bernardo.
Sasin dehan bainhira José Bernardo han etu ne’ebé nia inan lori, polísia hateten labele han iha-ne’e, bá han iha-laran. Polísia ne’e tenik dala tolu, maibé José Bernardo hatán hakarak nia hakarak han iha-ne’e besik ninia inan.
Sasin deklara katak momentu polísia lori nia husi Eskuadra Vera-Krúz bá sela Komandu PNTL, tuir dalan nia dehan ba sasin katak nia oan tauk, tan ne’e presiza ninia akompañamentu, maibé sasin hanesan inan enkoraja José Bernardo katak labele ta’uk tanba polísia ho farda atu defende ema. Nune’e mak sasin kontinua akompaña nia oan to’o tama sela laran iha tuku 13:30.
Sasin dehan, momentu José Bernardo hakat tama bá sela laran, nia la hameno tan liafuan ruma, maibé sasin haree nia kondisaun di’ak.
Sasin hateten, iha tuku 15:00 Otl, sasin haruka nia oan feto ida atu bá haree José Bernardo iha sela maibé alin feto la tama laran tanba la hetan autorizasaun husi polísia.
Sasin deklara, iha tuku 19:00 Otl, polísia ida husi Eskuadra Vera-Krúz mak bá fó hateten iha uma Audian katak suspeitu José Bernardo ne’ebé ohin polísia detein iha sela Komandu Polísia Dili ne’e hakotu ona iis (mate) tanba tara aan. Hafoin ne’e mak família mai kedas komandu Dili hodi haree katak José Bernardo mate duni.
Hafoin Tribunál rona tiha sasin RS nia depoimentu, Tribunál marka fali audiénsia ba loron 4 Abríl tuku 14:00 Otl hodi kontinua rona deklarasaun husi sasin tolu.
Jornalista: Natalino Costa
Editór: Xisto Freitas da Piedade
