DILI, 24 Marsu 2025 (TATOLI)–Peskizadór Programa Monitorizasaun ba Sistema Judisiáriu (JSMP-sigla portugés), Luís Oliveira Sampaio, konsidera desizaun ne’ebé Supremu Tribunál Justisa foti ba Arnolfo Teves Jr ne’ebé desidida la estradita ne’e konstitusionál.
“Primeiru, ami la haree ba polítika entre país más ita haree ba efeitu seluk iha sistema judisiáriu nia laran. Tuir ami-nia avaliasaun no prespetiva, desizaun ida-ne’e desizaun última ne’ebé Tribunál halo,” Luís hateten ba jornalista sira iha nia kna’ar fatin, Kolmera, segunda ne’e.
Luís esplika, se Ministériu Públiku sente katak desizaun ne’e la benefísia Estadu, nia atu halo fali rekursu ne’e laiha dalan ona tanba desizaun ne’ebé Supremu Tribunál Justisa foti, ida-ne’e dalan ikus ona.
Notísia relevante: Supremu Tribunál Justisa deside la halo estradisaun ba Arnolfo Teves
Anaunser, nia dehan, Ministériu Públiku esplora alternativa tuir regra Kódigu Prosesuál ne’ebé permite haree didi’ak fali ka presiza hakle’an liután regra sira ba prosesu ne’e.
“Konstituisaun defende buat rua. Ida mak Estadu iha obrigasaun atu proteje ema sira-ne’ebé husu azilu iha ita-nia rain no seluk Estadu labele proteje ema ne’ebé komete krime. Tanba ne’e, ami husu ba Ministériu Públiku atubele buka tuir kestaun sira-ne’e, seráke ema ne’e iha nia nasaun orijen hetan persegisaun polítika mak nia mai husu azilu, ka nia komete krime omesídiu. Se nia halo krime, pur ezemplu, nia oho ema ka halo korrupsaun, ida-ne’e ita-nia Estadu la responsabiliza. Só buat ida énfaze mak kestaun kona-ba nia luta ba defende interese Estadu no interese direitu umanu,” Luís haktuir.
Jornalista: Natalino Costa
Editór: Xisto Freitas da Piedade
