DILI, 25 Marsu 2025 (TATOLI)—Provedor dos Direitos Humanos e Justiça, Virgílio da Silva Guterres, hateten desizaun ne’ebé mak Supremu Tribunál Justisa (STJ) foti hodi la halo estradisaun ba Arnolfo Teves Jr ne’e konstitusionál.
“Lei limita kompeténsia provedór atu kestiona ka atu análize ba desizaun Tribunál ninian. Desizaun Tribunál iha-ne’ebé de’it ita hotu tenke submete. Ba sira-ne’ebé sente desizaun ne’e la justu, sira bele buka halo rekursu tuir artigu 35 ne’ebé iha-ne’ebá hateten katak ita só bele estradita sidadaun ba nia rai ne’e ninia Estadu tenke garante katak nia fila bá prosesu justisa ne’ebé justu no nia sei la hetan pena perpétua ka pena morte. Ba ami, desizaun ne’e bazeia ba konstituisaun,” Virgílio hateten ba jornalista sira iha edifisiu Krúz Vermella Timor-Leste (CVTL-sigla portugés), Kaikoli, tersa ne’e.
Nia dehan, desizaun Supremu Justisa Tribunál ne’e tanba bazeia ba sirkunstánsia sira-ne’ebé hatudu katak maski Filipina hateten katak nia lei ba pena morte ne’e sira revoga ona maibé hafoin Tribunál konfirma ba faktu no prova sira inklui ekipa Tribunál la hetan garante katak Filipina revoga ona sira-nia lei hodi la fó pena morte.
Notísia relevante: JSMP konsidera Tribunál nia desizaun ba Arnolfo tuir Konstituisaun
“Ami halo konfirmasaun ho Filipina liuliu parte Direitu Umanu Filipina ninian katak Filipina revoga tiha ona pena morte ne’e, maibé ida-ne’e Tribunál la hetan. Tanba ne’e, desizaun Tribunál nian ne’e bazeia ba evidénsia sira-ne’ebé Tribunál iha. Dalaruma la hatudu garante ida-ne’e, tanba ne’e mak ita hasai desizaun ho modelu ida-ne’e,” nia afirma.
Virgílio tenik, ema hotu-hotu tenke respeita ba desizaun Tribunál tanba desizaun ida-ne’e desizaun ne’ebé mak aas liu hotu.
“Agora, buat ne’ebé ha’u rekomenda mak Estadu tenke fó garantia ruma katak bainhira nia (Arnolfo) estadia iha Timor, la fó ameasa ba ita-nia seguransa no la halo krime ba ita-nia sistema justisa no sosiál iha Timor,” nia konklui.
Jornalista: Natalino Costa
Editór: Xisto Freitas da Piedade
