DILI, 25 Marsu 2025 (TATOLI)—Ministru Interiór, Francisco da Costa Guterres, hateten Ministériu Interiór (MI) simu pedidu reklamasaun husi membru PNTL na’in-200 ne’ebé la konkorda ba promosaun diviza tranzitória ne’ebé Komandu Polísia Nasionál Timor-Leste (PNTL) hamutuk ho MI halo tanba promosaun diviza ne’e konsiderada la proporsionál no hamosu diferensa boot.
“Entre membru 2.743 ne’e, na’in-200 mak la konkorda. Sira bá reklama ne’e tanba de’it sira dehan hanesan ne’e, ami loloos hakarak sa’e tan. Reklamasaun sira-ne’e mai husi ofisiál sira inklui ajente balun,” Francisco hateten ba jornalista sira iha Bebora, Dili, tersa ne’e.
Maski nune’e, Governante garante sei rezolve reklamasaun sira-ne’e.
“Bá-oin, neineik-neineik ita sei rezolve problema sira-ne’e. Tanba iha balun ladún komprende tanba ladun informadu. Maibé, bá-oin, ita sei rezolve problema ida-ne’e. Tanba buat hotu-hotu la’o tuir nia prosesu sira ka tuir ninia modalidade,” nia afirma.
Notísia relevante: Rekrutamentu membru PNTL foun tenke tau sees interese família
Nia esplika katak reklamasaun membru polísia na’in-200 ne’e ligadu ho tanbasá promosaun diviza tranzitória ne’e tenke ba ajente to’o inspetór xefe no tenke tuir modalidade, maibé komisaun esplika ona ba sira kona-ba modalidade sira-ne’e tanba promosaun tenke tuir modalidade.
“Balun dalaruma haree nia kolega ne’e tanba veteranu 15 a 19 maibé nia ida reklama dalaruma iha de’it 4 a 7, lahanesan ida 15 a 19. Entaun, mosu diferensa iha-ne’e nia labele hanesan ho nia maluk, tanba ne’e nia reklama. Más, modalidade ne’e iha tiha ona. Se 4 a 7 sa’e husi ne’e to’o mai iha-ne’e no se 15 a 19 sa’e husi ne’e mai to’o iha-ne’e, tanba ida-ne’e parte ida husi sira-nia partisipasaun luta,” nia haktuir.
Francisco dehan, hanesan membru Governu ne’ebé tutela ba área seguransa, sei buka hodi rezolve problema polísia nune’e instituisaun PNTL bele la’o di’ak bá-oin.
Jornalista: Natalino Costa
Editór: Xisto Freitas da Piedade
