DILI 27 Marsu 2027 (TATOLI) – Iha aniversáriu Polísia Nasionál Timor-Leste (PNTL) ba da-25, Primeiru-Ministru, Xanana Gusmão, husu ba PNTL kontinua sai orgullu ba komunidade no inspira timoroan tomak ba dezenvolvimentu sosiedade ida ne’ebé pasífika, tolerante no próspera.
Iha selebrasaun loron PNTL ho tema “Hamutuk Ita Hametin Konfiansa”, Xefe Governu hateten PNTL mak instituisaun fundamentál iha seguransa no estabilidade país.
“Membru PNTL, ba imi hotu-hotu, ha’u hato’o parabéns. Ne’e hanesan oportunidade únika ida hodi rekoñese no agradese imi hotu nia profisionalizmu, ho imi-nia dedikasaun ba povu Timór”, Xanana hato’o iha ámbitu komemorasaun loron PNTL iha Palásiu Governu, ohin.
Nia dehan loron 27 Marsu 2025, la’ós selebra de’it instituisaun nia aniversáriu, maibé mós hanesan momentu istóriku ida kona-ba transformasaun institusionál PNTL.
“Hanesan ita-boot sira hatene [PNTL] moris kedan ona bainhira hahú konstrusaun Estadu ida-ne’e. Mezmu molok restaurasaun ofisiál indepéndénsia hahú husi ne’ebá, instituisaun ida-ne’e hasoru obstákulu, krize no dezafiu boot, husi loron ba loron, tinan ba tinan”, nia relata.
Tuir nia, Polísia Nasionál sai hanesan pilár ka ai-riin boot ba demokrasia nian hodi serví ba povu. “PNTL dezempeña ona papél ne’ebé vitál tebes iha manutensaun orden públika hodi garante hothotu bele moris iha komunidade ne’ebé segura no moris hakmatek”.
Xefe Ezekutivu ne’e realsa katak kompromisu boot ba seguransa públika mak merese ema hotu nia profundu respeitu ba PNTL.
Promosaun PNTL reprezenta devér Estadu no kompromisu Governu
Primeiru-Ministru iha aniversáriu PNTL mós toka kona-ba promosaun ba membru polísia rihun 2-resin. Tuir nia, promosaun ida-ne’e devér husi Estadu no reprezenta mós kompromissu husi Governu atu promove kultura institusionál ida ne’ebé valoriza korajen, sakrifísiu, disiplina no prestasaun servisu, hodi garante kontínua reforsu iha kapasidade institusionál.
“Promosaun hirak-ne’e, ne’ebé prevee hotu ona iha idaidak nia estatutu, hakarak korrije dezekilíbriu istóriku, hametin estrutura komandu, rekoñese kontributu estraordináriu, nomós rekoñese kapasidade lideransa iha momentu difísil”, nia dehan.
Nia akresenta transformasaun husi jerasaun ba jerasaun ne’e sei promove forsa seguransa ida ne’ebé ho kapasidade profisionál, ne’ebé orienta ho valór fundamentál hanesan ierarkia, disiplina no integridade.
“Prosesu promosaun ne’e tomak hala’o tuir kritériu rigorozu no superviziona husi komisaun ida ne’ebé independente husi kualkér influénsia ho karáter polítiku ka sosiál hanesan grupu husi arte marsiál. Ne’e prosesu ida ne’ebé hetan partisipasaun husi membru PNTL sira hotu, nune’e garante totál transparénsia ho meritokrasia iha kada dezisaun”, Xanana afirma.
Nia subliña katak promosaun hirak-ne’e fó onra ka valoriza forma servisu oioin ba nasaun, inklui antiguidade ho esperiénsia, partisipasaun iha luta ba independénsia ho lealdade institusionál durante krize 2006-2008, ne’ebé membru PNTL hamriik metin hasoru ameasa ba ezisténsia instituisaun no arriska sira-nia moris rasik hodi proteje povu nu’udar símbolu no órgaun soberania nasionál.
Tanba ne’e, Xanana dehan iha ámbitu aperfeisoamentu konstante ka kontínuo mak renovasaun ierarkia hanesan fortalesimentu boot ida ba estrutura komandu no lideransa, ho efeitu transformadór.
“Transformadór tanba ita presiza la’ós de’it asegura kontinuidade iha prestasaun servisu ne’ebé halo ona, maibé hadi’a frajilidade, liuhusi tranzmisaun valór ho prátika fundamentál ba jerasaun foun husi polísia”, salienta.
Nia hatutan promosaun la signifika de’it rekoñesimentu, maibé mós responsabilidade ne’ebé boot liután.
“Ofisiál ho sarjentu foun sira-nia misaun mak atu lidera ho ezemplu no hasa’e padraun profisionalizmu PNTL nian. Loron ohin ne’e asinala la’ós de’it konkluzaun husi prosesu ida, maibé inísiu husi era foun ida ba PNTL. Era ida ne’ebé ho estrutura komandu renovada no fortalesida, signifika preparasaun boot liután atu hasoru dezafiu instituisaun no país tomak nian, inklui dezafiu tanba integrasaun iha organizasaun hanesan ASEAN ho organizasaun multilaterál sira seluk”, nia dehan.
Xefe Governu karesenta katak país ne’e presiza la’ós de’it atu PNTL promove bein-estar sidadaun nian, maibé atu hakbesik-aan ba sidadaun timoroan sira ho ema sira ne’ebé, maske sira la’ós timoroan, sira hela iha país.
“Ha’u fó-hanoin, katak PNTL la servisu mesak, ninia kapasidade ho seguransa nasionál rasik depende ba koordenasaun esforsu husi Estadu, husi Governu no husi Forsa Defeza no Seguransa, tuir lei ho Konstituisaun”, nia salienta.
Tanba ne’e, ba kestaun seguransa ema hotu nian. “Importante mós kolaborasaun husi komunidade ho lideransa lokál, iha ambiente parseria ne’ebé permite hametin konfiansa ba malu, no ema hotu-hotu bele servisu hamutuk ba páa no ba prosperidade país”, konkluiu.
Notísia relevante: KomJer PNTL apela ba membru halakon arogánsia no atuasaun la tuir prosedimentu
Jornalista: Arminda Fonseca
Editora: Maria Auxiliadora
