DILI, 28 Marsu 2025 (TATOLI)–Ministériu Edukasaun (ME), kuarta semana kotuk (19/03/2025), identifika estudante mane ida hosi Ensinu Sekundáriu Jerál (ESJ) balun iha Dili, koko lori diploma falsu lori bá Diresaun Nasionál Ensinu Sekundáriu Jerál atu hetan legalizasaun maibé la konsege.
“Foin lalais ami deskobre estudante ida hosi eskola 04 Setembru UNAMET Balide ne’ebé lori diploma falsu mai atu legaliza, maibé ami halo identifikasaun ba nia diploma katak falsifika no prosesu iha hela inspesaun jerál,” Diretór Diresaun Nasionál Ensinu Sekundáriu Jerál, Benjamin Fernandes, hatete iha nia knaar fatin, Vila Verde, sesta ne’e.
Nia hatutan kazu ne’e entrega ona ba inspesaun jerál hodi kontinua prosesu bá-oin.
“Kazu ne’e ami telefone nia (estudante) depois bolu Diretór Eskola 04 Setembru, tanba ne’e nia mak asina diploma, más konfirmadu katak la’ós diretór ne’e nia asinatura,” Benjamin haktuir.
“Ami bolu mós Koordenadór Gabinete Kurríkulu, tanba nia manda prodús diploma no parte inspesaun jerál ita bolu tanba nia mak prosesa kazu,” nia hatutan.
Kazu ne’e akontese iha 19 Marsu liubá, estudante referidu lori diploma mai fó ba kazuál Ministériu Edukasaun nian, maibé kazuál ne’e la simu no haruka nia hatama direta bá Diresaun Nasionál Ensinu Sekundáriu Jerál nian, hafoin ne’e konfirmadu katak diploma ne’e falsu.
“Entaun, ami la dehan ba nia. Ami haruka nia fila depois hein telefone hosi ami,” Benjamin tenik.
Nia hatutan parte relevante lori diploma ne’e hodi konfirma iha Diresaun Kurríkulu no identifika katak diploma ne’e uza númeru série hosi Ensinu Báziku ida iha Edukasaun Munisípiu Vikeke nian.
Nune’e, biban ne’e, Ministériu Edukasaun liuhusi nia Diresaun Ensinu Sekundáriu husu inan-aman katak Ministériu Edukasaun loke gratuita nune’e inan-aman haruka nia oan mak hetan diploma, labele fiar ema iha li’ur hodi uza osan ba diploma falsu, ida-ne’e inan-aman ho oan mak sei todan.
“Edukasaun loke to’o área rurál katak edukasaun hakbesik ba komunidade. Tan ne’e, di’akliu eskola mak hetan diploma. Ami halo hanesan ne’e, halo diploma falsu, imi inan-aman mak lakon,” Benjamin subliña.
Jornalista: Osória Marques
Editór: Xisto Freitas da Piedade
