DILI, 28 Marsu 2025 (TATOLI)–Ministériu Edukasaun (ME), liuhusi Diresaun Nasionál Ensinu Sekundáriu Jerál (DNESJ), legaliza ona diploma ba Eskola Ensinu Sekundáriu Jerál (ESJ) hamutuk 2.100 iha Fevereiru-Marsu, tinan ne’e.
“Legaliza diploma iha oinoin. Ida mak legaliza baibain no ida seluk mak tradús ba lian inglés. Karik bá hala’o estudu iha Austrália ka Amérika no iha balun kontinua iha Indonézia, entaun presiza diploma ho lian referida (inglés), ka iha estudante balun ne’ebé pasa bolsa estudu ba Xina entaun tenke tradús ho lian Xina,” Diretór Diresaun Nasionál Ensinu Sekundáriu Jerál (DNESJ), Benjamin Fernandes, hateten iha nia kna’ar fatin, Vila Verde, sesta ne’e.
“Kona-ba atu tradús, ami fó de’it formatu translate ba sira depois lori mai ami legaliza. Kona-ba kritériu ne’e estudante lori diploma orijinál hodi hatudu nune’e ita bele prosesa tradusaun referida,” nia esplika.
Notísia relevante: ME identifika estudante ida iha ESJ uza diploma falsu
Diretór ne’e hatutan katak legaliza diploma ne’e depende ba tempu graduasaun no aplika ba bolsu estudu ruma.
“Kada ema fotokopia diploma tahan-lima no kaderneta eskolár tahan-tolu. Nune’e mós, depende ba rekrutamentu bolsa estudu ne’ebé eziste,” Benjamin dehan.
Nia informa, legaliza ida-ne’e la’ós de’it iha Dili maibé munisípiu mós iha, tanba ne’e diresaun atende de’it tuir nesesidade estudante sira.
“Se estudante sira hetan bolsa estudu no atu halo graduasaun ruma mak dehan hatama dokumentu lalais, inklui ho diploma sira-ne’e, entaun diresaun ne’e simu estudante nia diploma ida mai ho urjentemente ne’e ami haruka hein no fó kedas. Maibé, se la urjénsia ne’e dadeer sira hatama hela lorokraik mak mai foti. Se lae, aban dadeer mak mai foti. Ita nunka husik prosesu kle’ur to’o loron-rua bá leten,” Benjamin haktuir.
Totál diploma ne’ebé legalizada iha fulan-Fevereiru hamutuk 1.047, kompostu husi diploma tradusaun 77, kaderneta 55. Entretantu, iha fulan-Marsu 1.053, kompostu husi diploma tradusaun 114, kaderneta 71. Nune’e, totál hamutuk 2.100.
Jornalista: Osória Marques
Editór: Xisto Freitas da Piedade
