DILI, 04 Abríl 2025 (TATOLI) – Instituisaun Públika, Inspesaun no Fiskalizasaun Atividade Ekonómika Sanitaria no Alimentar (AIFAESA, I.P) kompostu husi Inspetora Jerál, Odete da Silva Viegas ho ekipa halo reinspesaun daruak hodi reativa fali atividade negósiu empreza Padaria Brasão, tanba kumpre ona rekezitu ne’ebé AIFAESA implementa.
Inspetora Jerál, Odete da Silva Viegas, haktuir, antes ne’e inspetór sira tuun ba Padaria Brasão nian, tama mós hanesan operadór ekonómiku sira-ne’ebé maka komete insfrasaun no AIFAESA hahú halo asesória temporária iha loron 19 fulan-Marsu 2025, no durante kuaze semana rua no mós ba informasaun ba iha operadór ekonómiku ne’e rasik, atu bele kumpri fali rekezitu ne’ebé mak AIFAESA fó ba iha empreza ne’e rasik.
“Infelizmente, ami mós kontente katak sira bele koopera di’ak i sira mós prienxe hotu ona rekezitu ne’ebé mak husi parte AIFAESA fó i husi parte AIFAESA hala’o reinspesaun dala rua iha loron 01 fulan-Abríl, sira konsege prienxe 95% rekezitu ne’ebé mak ita fó ba sira. No, iha horiseik sira kompleta rekezitusne’ebé mak iha”, Inspetora Odete da Silva Viegas, hateten ba jornalista sira iha Bairro dos Grilos, Formosa, Dili, ohin.
Inspetora afirma, prosesu prienxe rekizitu husi empreza signifika rekomendasasaun sira husi AIFAESA, ne’e Empreza Padaria Brasão koopera no konkorda. Entaun, empreza mós iha obrigasaun, hanesan fatin ne’ebé mak sira halo komersializasaun produtu alimentar hanesan paun ne’ebé ema barak konsumu.
Koima ka sansaun ne’ebé operadór ekonómiku komete irregualaridade ne’e fahe ba kategória rua iha ida ladun no ida mak gravidade. Koima ne’e hahú husi montante $250 to’o rihun-75 USD.
“Ema ida-idak iha nia direitu atu halo negósiu maibé negósiu ita labele prejudika fali ema nia vida ka fó risku ba saúde públiku”, autoridade AIFAESA ne’e dehan.
Iha fatin hanesan, Jestór Padaria Brasão, Francisco Soares Martins, informa, iha rekezitu balun ne’ebé sira presiza kompleta mak hanesan parte ijiene nian no kondisaun ba fatin ne’ebé ladun di’ak, entaun presiza hadi’a.
“Ho buat hirak ne’ebé maka AIFAESA haruka ami hadi’a, ami kompleta ona i hodi nune’e sira bele fó fali dalan mai ami, i ami bele reativa fila-fali atividade hanesan baibain” nia akresenta.
Enkuantu, institutu AIFAESA kuaze taka operadór ekonómiku hamutuk rua nulu, kompostu husi kapitál Dili no Oekusi. Tanba ne’e, husu ba empreza sira atu bele servisu hamutuk ho AIFAESA nune’e bele hadi’a kondisaun produsaun ba iha produtu ne’e rasik. No, sei taka barak liután se bainhira operadór sira la kumpre rekezitu husi AIFAESA.
Notísia relevante:AIFAESA taka padaria Brasão tanba komete irregularidade
Jornalista: Alexandra da Costa
Editór: Rafael Ximenes de A. Belo
