DILI, 03 Abríl 2025 (TATOLI)–Ministru Interiór, Francisco da Costa Guterres, hateten, Juñu tinan ne’e, Komandu Polísia Nasionál Timor-Leste (PNTL) sei halo abertura ba rekrutamentu membru polísia foun.
“Ita halo ona promosaun trazitória. Tuir ita sei bá faze rekrutamentu. Signifika, fulan-Juñu ita sei hahú abertura ba rekrutamentu membru PNTL foun,” Francisco Guterres informa ba jornalista sira iha Ministériu Finansa, Aitarak-Laran, kinta nee.
Governante ne’e dehan, kritériu ba rekrutamentu ne’e Komandu Jerál Polísia Nasionál Timor-Leste enkamiña ona mai iha Ministériu Interiór.
“Ekipa husi Ministériu Interiór no Komandu PNTL sira sei diskute no karik haree loos ona, ha’u hasai despaxu ita avansa bá rekrutamentu,” nia informa.
Notísia relevante: Rekrutamentu membru PNTL sei fahe kuota hanesan iha kada Munisípiu
Iha parte seluk, Komandante Jerál Polísia Nasionál Timor-Leste, Komisáriu Jerál Polísia Henrique da Costa esplika, kona-ba rekrutamentu, husi Komandu PNTL hato’o ona pedidu ida ba Ministru Interiór, hein de’it despaxu husi Ministru Interiór nune’e bele realiza rekrutamentu.
“Depois ita hein iha autorizasaun ka despaxu mai ita bele realiza. Ha’u labele hateten katak bainhira mak realiza, maibé ita hein de’it despaxu husi Ministru Interiór,” nia konklui.
Jornalista: Natalino Costa
Editór: Xisto Freitas da Piedade
