DILI, 03 Abríl 2025 (TATOLI)—Ministru Komérsiu no Indústria, Filipus Nino Pereira, kinta ne’e, hala’o vizita ba empreza Padaria Orientál Unip, Lda no enkoraja empreza atu promove produtu ai-han ba konsumidór sira.
“Ohin, ami mai vizita empreza Padaria Orientál Unip, Lda, ne’ebé durante ne’e tunu paun entaun ami enkoraja katak nafatin promove produtu ai-han ba konsumidór sira tanba ami haree katak fatin moos no husu sira nafatin mantein ijiene di’ak,” Nino Pereira dehan ba jornalista sira, iha Padaria Liquintai, Dili.
Nia hateten, empreza ida-ne’e hanesan indústria ki’ik ida, maibé sira hahú daudaun dezenvolve aan no diversifika ona produtu iha-ne’ebé uluk tunu de’it paun maran, maibé agora paun midar mós iha, roti tawar, donat no seluk tan, entaun ida-ne’e modifika ona produtu sira-ne’e ho di’ak liután.
“Ha’u hanoin husi empreza mós halo ona peskiza ba iha merkadu no prodús tuir duni nesesidade merkadu nian. Tanba ne’e, ha’u hanoin ida-ne’e importante no hola-parte ba iha promove espíritu emprendedorizmu nian. Ohin loron ita ko’alia katak ita presiza kriasaun empregu aumenta barak, entaun dalan ida mak liuhusi kriasaun indústria ki’ik sira, nune’e bele hola-parte halo rekrutamentu ba joven sira atu serbisu iha indústria ki’ik sira hanesan ne’e,” nia esplika.
Tuir governante ne’e katak empreza ida-ne’e haree hanesan indústria ba ai-han nian ne’ebé la’o ona durante tinan 50-resin ne’ebé koñesidu ho naran Paun Liquintai, entaun sira iha ona merkadu rasik no garante katak sira la lakon sira-nia konsumidór sira.
“Ita-nia vizita ne’e, hatudu katak Governu liuhusi Ministériu Komérsiu no Indústria kontinua hakbiit no promove mikro, pekena no média empreza ne’ebé mak sai hanesan fatór determinante ida ba dezenvolvimentu iha ita-nia nasaun,” nia haktuir.
Iha fatin hanesan, Empreza Padaria Orientál Unip, Lda Neng Jung LM, agradese ba Ministru Komérsiu no Indústria ne’ebé bele vizita ona fatin ida-ne’e atu haree kondisaun ne’ebé mak iha.
“Ami kontente tanba Ministru bele mai to’o ami-nia fatin hodi haree direta fatin tunu paun nian, tanba ami-nia fatin ne’e harii besik ona tinan 50, entaun problema ne’ebé ami durante hasoru mak ai-sunu tanba Governu bandu labele tesi ai entaun ida-ne’e susar tebes ba ami,” nia esplika.
Nia haktuir, paun durante ne’e sira fa’an ho presu fuan 12/$1, maibé banhira folin trigu sa’e fa’an fali bá fuan 10/$1. Traballadór sira ne’ebé mak servisu iha-ne’ebá hamutuk 14.
Jornalista: Felicidade Ximenes
Editór: Xisto Freitas da Piedade
